tumhein mujh mein kya nazar aa gaya jo mera ye rup bana gae

tumheñ mujh meñ kyā nazar aa gayā jo mirā ye ruup banā ga.e

vo tamām log jo ishq the vo mire vajūd meñ aa ga.e

na tire sivā koī likh sake na mire sivā koī paḌh sake

ye hurūf-e-be-varaq-o-sabaq hameñ kyā zabān sikhā ga.e

na kar aaj ham se ye guftugū mujhe kyuuñ huī tirī justujū

are ham bhī ek ḳhayāl the so tire bhī zehn meñ aa ga.e

jo sunā ki ghar tire jā.eñge tire sehan o baaġh sajā.eñge

mire ashk uḌ ke havā ke saath unhī bādaloñ meñ samā ga.e

dil-e-shab meñ sub.h kī dhaḌkaneñ abhī ibtidā-e-ġhazal meñ thiiñ

ki vo aa.e aur tamām sher mirī hī dhun meñ sunā ga.e

jo na aap us pe hue ayaañ ye rakhegā ham ko bhī sar-girāñ

ka.ī baar le ke shikāyateñ mire dost arz o samā ga.e

ka.ī mahfiloñ meñ to yuuñ huā ki jab aa.e 'ālī'-e-ḳhush-adā

jo na khul sake to chhupe rahe jo na ro sake to rulā ga.e

tumhein mujh mein kya nazar aa gaya jo mera ye rup bana gae

wo tamam log jo ishq the wo mere wajud mein aa gae

na tere siwa koi likh sake na mere siwa koi paDh sake

ye huruf-e-be-waraq-o-sabaq hamein kya zaban sikha gae

na kar aaj hum se ye guftugu mujhe kyun hui teri justuju

are hum bhi ek KHayal the so tere bhi zehn mein aa gae

jo suna ki ghar tere jaenge tere sehan o bagh sajaenge

mere ashk uD ke hawa ke sath unhi baadalon mein sama gae

dil-e-shab mein subh ki dhaDkanen abhi ibtida-e-ghazal mein thin

ki wo aae aur tamam sher meri hi dhun mein suna gae

jo na aap us pe hue ayan ye rakhega hum ko bhi sar-giran

kai bar le ke shikayaten mere dost arz o sama gae

kai mahfilon mein to yun hua ki jab aae 'ali'-e-KHush-ada

jo na khul sake to chhupe rahe jo na ro sake to rula gae