tu agar abr hai main abr mein pani ki tarah

tū agar abr hai maiñ abr meñ paanī kī tarah

maiñ tire saath huuñ lafzoñ meñ ma.ānī kī tarah

nafsī-nafsī kā ye aalam hai ki aate jaate

tum mile bhī to qayāmat kī nishānī kī tarah

yuuñ hī ik roz guzar jā.ūñgā rāhoñ se tirī

maiñ bhī bahtī huī nadiyoñ kī ravānī kī tarah

dekh kar tujh ko kaleje meñ kasak uThtī hai

dhaj tirī hai mirī āshufta-bayānī kī tarah

nā-murādī meñ tū ai dasht akelā hī nahīñ

maiñ bhī pyāsā huuñ tirī tishna-dahānī kī tarah

aaj sun lo mirī bāteñ ki abhī zinda huuñ

kal sunā jā.ūñgā mahfil meñ kahānī kī tarah

tu agar abr hai main abr mein pani ki tarah

main tere sath hun lafzon mein maani ki tarah

nafsi-nafsi ka ye aalam hai ki aate jate

tum mile bhi to qayamat ki nishani ki tarah

yun hi ek roz guzar jaunga rahon se teri

main bhi bahti hui nadiyon ki rawani ki tarah

dekh kar tujh ko kaleje mein kasak uThti hai

dhaj teri hai meri aashufta-bayani ki tarah

na-muradi mein tu ai dasht akela hi nahin

main bhi pyasa hun teri tishna-dahani ki tarah

aaj sun lo meri baaten ki abhi zinda hun

kal suna jaunga mahfil mein kahani ki tarah