tu ne kyun humse tawaqqo na musafir rakkhi

tū ne kyuuñ ham se tavaqqo na musāfir rakkhī

ham ne to jaañ bhī tire vāste hāzir rakkhī

haañ ab us samt nahīñ jaanā par ai dil ai dil

baam par us ne koī sham.a agar phir rakkhī

ye alag baat ki vo dil se kisī aur kā thā

baat to us ne hamārī bhī ba-zāhir rakkhī

ab kisī ḳhvāb kī zanjīr nahīñ paañv meñ

taaq par vasl kī ummīd bhī āḳhir rakkhī

jab bhī jī chāhtā marne ko hazāroñ the javāz

zindagī ham ne salāmat tirī ḳhātir rakkhī

hijr kī shab koī va.ada na koī yaad 'zafar'

tū ne kyā chiiz bachā kar mire shā.er rakkhī

tu ne kyun hum se tawaqqo na musafir rakkhi

hum ne to jaan bhi tere waste hazir rakkhi

han ab us samt nahin jaana par ai dil ai dil

baam par us ne koi shama agar phir rakkhi

ye alag baat ki wo dil se kisi aur ka tha

baat to us ne hamari bhi ba-zahir rakkhi

ab kisi KHwab ki zanjir nahin panw mein

taq par wasl ki ummid bhi aaKHir rakkhi

jab bhi ji chahta marne ko hazaron the jawaz

zindagi hum ne salamat teri KHatir rakkhi

hijr ki shab koi wada na koi yaad 'zafar'

tu ne kya chiz bacha kar mere shaer rakkhi