unki god mein sar rakh kar jab aansu aansu roya tha

un kī god meñ sar rakh kar jab aañsū aañsū royā thā

kuchh lamhe guzre vo lamha merī āñkhoñ se guzrā thā

ai sāTan ke niile pardo tum par ye kis kā saaya hai

kyā mujh ko kuchh vahm huā hai yā sach-much koī aayā thā

jaise darvāza vā kar ke niklā hai koī kamre se

jaise ik do lamhe guzre sofe par koī baiThā thā

sach sach kahnā ai dīvāro ai tasvīro jhuuT na bolo

āḳhir hai tū us kamre meñ jis ne us kā naam liyā thā

tum to kuchh aise bhuul ga.e ho jaise kabhī vāqif hī nahīñ the

aur jo yūñhī karnā thā sāhab kis liye itnā pyaar kiyā thā

aaj to sarsoñ kā pīlā-pan agnī bhartā hai tan man meñ

ek samay thā jab yahī mausam khet khet pyārā lagtā thā

ek purāne giit kī dhun ne guzrī yādeñ yaad dilā diiñ

dāman ko ashkoñ se bhigo.e ek zamāna biit chalā thā

un ki god mein sar rakh kar jab aansu aansu roya tha

kuchh lamhe guzre wo lamha meri aankhon se guzra tha

ai saTan ke nile pardo tum par ye kis ka saya hai

kya mujh ko kuchh wahm hua hai ya sach-much koi aaya tha

jaise darwaza wa kar ke nikla hai koi kamre se

jaise ek do lamhe guzre sofe par koi baiTha tha

sach sach kahna ai diwaro ai taswiro jhuT na bolo

aaKHir hai tu us kamre mein jis ne us ka nam liya tha

tum to kuchh aise bhul gae ho jaise kabhi waqif hi nahin the

aur jo yunhi karna tha sahab kis liye itna pyar kiya tha

aaj to sarson ka pila-pan agni bharta hai tan man mein

ek samay tha jab yahi mausam khet khet pyara lagta tha

ek purane git ki dhun ne guzri yaaden yaad dila din

daman ko ashkon se bhigoe ek zamana bit chala tha