uTh jae gar ye bich se parda hijab ka

uTh jaa.e gar ye biich se parda hijāb kā

dariyā hī phir to naam hai har ik hubāb kā

kyuuñ chhoḌte ho durd-e-tah-e-jām mai-kasho

zarra hai ye bhī āḳhir usī āftāb kā

aisī havā meñ paas na saaqī na jām-e-mai

ronā bajā hai haal pe mere sahāb kā

honā thā zindagī hī meñ muñh shaiḳh kā siyāh

is umr meñ hai varna mazā kyā ḳhizāb kā

is dasht-e-pur-sarāb meñ bahke bahut pa haif

dekhā to do qadam pe Thikānā thā aab kā

zāhid marīz-e-ishq pe ho sharb-e-mai harām

baare ye mas.ala hai tirī kis kitāb kā

juuñ surma kyuuñ na chashm meñ 'qā.em' kī ho jagah

āḳhir vo ḳhāk-e-pā hai shah-e-bū-turāb kā

uTh jae gar ye bich se parda hijab ka

dariya hi phir to nam hai har ek hubab ka

kyun chhoDte ho durd-e-tah-e-jam mai-kasho

zarra hai ye bhi aaKHir usi aaftab ka

aisi hawa mein pas na saqi na jam-e-mai

rona baja hai haal pe mere sahab ka

hona tha zindagi hi mein munh shaiKH ka siyah

is umr mein hai warna maza kya KHizab ka

is dasht-e-pur-sarab mein bahke bahut pa haif

dekha to do qadam pe Thikana tha aab ka

zahid mariz-e-ishq pe ho sharb-e-mai haram

bare ye masala hai teri kis kitab ka

jun surma kyun na chashm mein 'qaem' ki ho jagah

aaKHir wo KHak-e-pa hai shah-e-bu-turab ka