waiz ki kaDwi baaton ko kab dhyan mein apne late hain

vaa.iz kī kaḌvī bātoñ ko kab dhyān meñ apne laate haiñ

ye rind-e-balā-nosh aise haiñ sunte haiñ aur pī jaate haiñ

ham aap se jo kuchh kahte haiñ vo bilkul jhuuT ġhalat ik dam

aur aap jo kuchh farmāte haiñ be-shubah bajā farmāte haiñ

dīvāna samajh kar chheḌ ke vo sunte haiñ hamārī bātoñ ko

ham matlab kī kah jaate haiñ vo soch ke kuchh rah jaate haiñ

majbūr-e-mohabbat kī hālat begāna-e-ulfat kyā jaane

ham ġhairoñ ke ta.ane sunte haiñ aur sun kar chup rah jaate haiñ

gardan hai jhukī nazreñ nīchī aur lab pe hai un ke tabassum bhī

hai qābil-e-dīd vo shoḳhī bhī jis vaqt ki vo sharmāte haiñ

behosh paḌe haiñ ishq meñ aur sar hai kisī ke zaanū par

tadbīreñ laakh kare koī ab hosh meñ ham kab aate haiñ

kaam 'anjum' kā jo tamām kiyā ye aap ne vāqa.ī ḳhuub kiyā

kam-baḳht isī ke laa.eq thā ab aap abas pachhtāte haiñ

waiz ki kaDwi baaton ko kab dhyan mein apne late hain

ye rind-e-bala-nosh aise hain sunte hain aur pi jate hain

hum aap se jo kuchh kahte hain wo bilkul jhuT ghalat ek dam

aur aap jo kuchh farmate hain be-shubah baja farmate hain

diwana samajh kar chheD ke wo sunte hain hamari baaton ko

hum matlab ki kah jate hain wo soch ke kuchh rah jate hain

majbur-e-mohabbat ki haalat begana-e-ulfat kya jaane

hum ghairon ke tane sunte hain aur sun kar chup rah jate hain

gardan hai jhuki nazren nichi aur lab pe hai un ke tabassum bhi

hai qabil-e-did wo shoKHi bhi jis waqt ki wo sharmate hain

behosh paDe hain ishq mein aur sar hai kisi ke zanu par

tadbiren lakh kare koi ab hosh mein hum kab aate hain

kaam 'anjum' ka jo tamam kiya ye aap ne waqai KHub kiya

kam-baKHt isi ke laeq tha ab aap abas pachhtate hain