wahi jo haya thi nigar aate aate

vahī jo hayā thī nigār aate aate

batā tū hī ab hai vo pyaar aate aate

na maqtal meñ chal saktī thī teġh-e-qātil

bhare itne ummīd-vār aate aate

ghaTī merī roz aane jaane se izzat

yahāñ aap khoyā viqār aate aate

jagah do to maiñ is meñ turbat banā luuñ

bharā hai jo dil meñ ġhubār aate aate

abhī ho ye fitna to kyā kuchh na hoge

javānī ke lail-o-nahār aate aate

ghaḌī hijr kī kaash yā rab na aatī

qayāmat ke lail-o-nahār aate aate

ḳhabar detī hai yaad kartā hai koī

jo bāñdhā hai hichkī ne taar aate aate

phir aa.e jo tum mehrbāñ jaate jaate

phirī gardish-e-rozgār aate aate

azal se abad ko to jaanā thā 'afsar'

chale aa.e ham us dayār aate aate

wahi jo haya thi nigar aate aate

bata tu hi ab hai wo pyar aate aate

na maqtal mein chal sakti thi tegh-e-qatil

bhare itne ummid-war aate aate

ghaTi meri roz aane jaane se izzat

yahan aap khoya wiqar aate aate

jagah do to main is mein turbat bana lun

bhara hai jo dil mein ghubar aate aate

abhi ho ye fitna to kya kuchh na hoge

jawani ke lail-o-nahaar aate aate

ghaDi hijr ki kash ya rab na aati

qayamat ke lail-o-nahaar aate aate

KHabar deti hai yaad karta hai koi

jo bandha hai hichki ne tar aate aate

phir aae jo tum mehrban jate jate

phiri gardish-e-rozgar aate aate

azal se abad ko to jaana tha 'afsar'

chale aae hum us dayar aate aate