waqt-e-safar qarib hai bistar sameT lun

vaqt-e-safar qarīb hai bistar sameT luuñ

bikhrā huā hayāt kā daftar sameT luuñ

phir jaane ham mileñ na mileñ ik zarā ruko

maiñ dil ke aa.ine meñ ye manzar sameT luuñ

yāroñ ne jo sulūk kiyā us kā kyā gilā

pheñke haiñ dostoñ ne jo patthar sameT luuñ

kal jaane kaise hoñge kahāñ hoñge ghar ke log

āñkhoñ meñ ek baar bharā ghar sameT luuñ

tār-e-nazar bhī ġham kī tamāzat se ḳhushk hai

vo pyaas hai mile to samundar sameT luuñ

'ajmal' bhaḌak rahī hai zamāne meñ jitnī aag

jī chāhtā hai siine ke andar sameT luuñ

waqt-e-safar qarib hai bistar sameT lun

bikhra hua hayat ka daftar sameT lun

phir jaane hum milen na milen ek zara ruko

main dil ke aaine mein ye manzar sameT lun

yaron ne jo suluk kiya us ka kya gila

phenke hain doston ne jo patthar sameT lun

kal jaane kaise honge kahan honge ghar ke log

aankhon mein ek bar bhara ghar sameT lun

tar-e-nazar bhi gham ki tamazat se KHushk hai

wo pyas hai mile to samundar sameT lun

'ajmal' bhaDak rahi hai zamane mein jitni aag

ji chahta hai sine ke andar sameT lun