wasl ke din ka ishaara hai ki Dhal jaunga

vasl ke din kā ishāra hai ki Dhal jā.ūñgā

dil ye kahtā hai ki qaabū se nikal jā.ūñgā

ātish-e-ishq baḌhī jaatī hai baiTho dam-bhar

garm-raftār rahoge to maiñ jal jā.ūñgā

intizār aap kā aisā hai ki dam kahtā hai

nigah-e-shauq huuñ āñkhoñ se nikal jā.ūñgā

dil se kahtā hai shab-e-vasl yahī shauq-e-visāl

maiñ vo armān nahīñ huuñ ki nikal jā.ūñgā

saikḌoñ zaḳhm lageñge na haTūñgā qātil

shajar-e-bāġh-e-mohabbat huuñ maiñ phal jā.ūñgā

ahd-e-tiflī se ye kahtā thā mizāj-e-jānāñ

dekh lenā ki javānī meñ badal jā.ūñgā

tifl-e-ashk aañkh tak aatā hai ye kahtā hai 'rashīd'

mujh ko mardum ne jo rokā to machal jā.ūñgā

wasl ke din ka ishaara hai ki Dhal jaunga

dil ye kahta hai ki qabu se nikal jaunga

aatish-e-ishq baDhi jati hai baiTho dam-bhar

garm-raftar rahoge to main jal jaunga

intizar aap ka aisa hai ki dam kahta hai

nigah-e-shauq hun aankhon se nikal jaunga

dil se kahta hai shab-e-wasl yahi shauq-e-visal

main wo arman nahin hun ki nikal jaunga

saikDon zaKHm lagenge na haTunga qatil

shajar-e-bagh-e-mohabbat hun main phal jaunga

ahd-e-tifli se ye kahta tha mizaj-e-jaanan

dekh lena ki jawani mein badal jaunga

tifl-e-ashk aankh tak aata hai ye kahta hai 'rashid'

mujh ko mardum ne jo roka to machal jaunga