wasl ke lamhe kahani ho gae

vasl ke lamhe kahānī ho ga.e

shab ke motī sub.h paanī ho ga.e

rafta rafta zindagānī ho ga.e

ġham ke lamhe jāvedānī ho ga.e

daulat-e-ahd-e-javānī ho ga.e

chand lamhe jo kahānī ho ga.e

kaisī kuchh rañgīniyāñ thiiñ jin se ham

mahv-e-sair-e-dahr-e-fānī ho ga.e

sukh bhare dukh dukh bhare sukh sab ke sab

vāqiāt-e-zindagānī ho ga.e

muskurā.e aap jaane kis liye

ham rahīñ-e-shādmānī ho ga.e

bātoñ hī bātoñ meñ rāteñ uḌ ga.iiñ

haa.e vo din bhī kahānī ho ga.e

tum ne kuchh dekhā ḳhulūs-e-jazb-e-shauq

sañg-reze gul ke paanī ho ga.e

'farhat' aisī but-parastī ke nisār

but bhī mahv-e-lan-tarānī ho ga.e

wasl ke lamhe kahani ho gae

shab ke moti subh pani ho gae

rafta rafta zindagani ho gae

gham ke lamhe jawedani ho gae

daulat-e-ahd-e-jawani ho gae

chand lamhe jo kahani ho gae

kaisi kuchh ranginiyan thin jin se hum

mahw-e-sair-e-dahr-e-fani ho gae

sukh bhare dukh dukh bhare sukh sab ke sab

waqiat-e-zindagani ho gae

muskurae aap jaane kis liye

hum rahin-e-shadmani ho gae

baaton hi baaton mein raaten uD gain

hae wo din bhi kahani ho gae

tum ne kuchh dekha KHulus-e-jazb-e-shauq

sang-reze gul ke pani ho gae

'farhat' aisi but-parasti ke nisar

but bhi mahw-e-lan-tarani ho gae