wo ishq jo humse ruTh gaya ab us ka haal bataen kya

vo ishq jo ham se ruuTh gayā ab us kā haal batā.eñ kyā

koī mehr nahīñ koī qahr nahīñ phir sachchā sher sunā.eñ kyā

ik hijr jo ham ko lāhaq hai tā-der use dohrā.eñ kyā

vo zahr jo dil meñ utaar liyā phir us ke naaz uThā.eñ kyā

phir āñkheñ lahū se ḳhālī haiñ ye sham.eñ bujhne vaalī haiñ

ham ḳhud bhī kisī ke savālī haiñ is baat pe ham sharmā.eñ kyā

ik aag ġham-e-tanhā.ī kī jo saare badan meñ phail ga.ī

jab jism hī saarā jaltā ho phir dāman-e-dil ko bachā.eñ kyā

ham naġhma-sarā kuchh ġhazloñ ke ham sūrat-gar kuchh ḳhvāboñ ke

be-jazba-e-shauq sunā.eñ kyā koī ḳhvāb na ho to batā.eñ kyā

wo ishq jo hum se ruTh gaya ab us ka haal bataen kya

koi mehr nahin koi qahr nahin phir sachcha sher sunaen kya

ek hijr jo hum ko lahaq hai ta-der use dohraen kya

wo zahr jo dil mein utar liya phir us ke naz uThaen kya

phir aankhen lahu se KHali hain ye shamen bujhne wali hain

hum KHud bhi kisi ke sawali hain is baat pe hum sharmaen kya

ek aag gham-e-tanhai ki jo sare badan mein phail gai

jab jism hi sara jalta ho phir daman-e-dil ko bachaen kya

hum naghma-sara kuchh ghazlon ke hum surat-gar kuchh KHwabon ke

be-jazba-e-shauq sunaen kya koi KHwab na ho to bataen kya