wo jo dagh-e-ishq tha KHush-numa jo amanat-e-dil-e-zar tha

vo jo dāġh-e-ishq thā ḳhush-numā jo amānat-e-dil-e-zār thā

sar-e-bazm thā to charāġh thā sar-e-rāh thā to ġhubār thā

use maiñ hī jānūñ huuñ dostoñ kisū vaqt apnā bhī yaar thā

kabhū mom thā kabhū sañg thā kabhū phuul thā kabhū ḳhaar thā

tirī yaad hai ki bujhī bujhī tirā zikr hai ki rukā rukā

tirī yaad se to sukūn thā tire zikr se to qarār thā

ye to vaqt vaqt kī baat hai hameñ un se koī gila nahīñ

vo hoñ aaj ham se ḳhafā ḳhafā kabhū ham se un ko bhī pyaar thā

vo nagar to kab kā ujaḌ gayā ham usī nagar se to aa.e haiñ

kahīñ maqbara thā ḳhulūs kā to kahīñ vafā kā mazār thā

jise shauq thā tirī diid kā jise pyaas thī tire pyaar kī

jo tirī galī meñ muqīm thā vahī ajnabī sar-e-dār thā

tire dil se merā ḳhulūs-e-dil na jhalak sakā to maiñ kyā karūñ

mire aks kī to ḳhatā na thī tire ā.īne pe ġhubār thā

wo jo dagh-e-ishq tha KHush-numa jo amanat-e-dil-e-zar tha

sar-e-bazm tha to charagh tha sar-e-rah tha to ghubar tha

use main hi jaanun hun doston kisu waqt apna bhi yar tha

kabhu mom tha kabhu sang tha kabhu phul tha kabhu KHar tha

teri yaad hai ki bujhi bujhi tera zikr hai ki ruka ruka

teri yaad se to sukun tha tere zikr se to qarar tha

ye to waqt waqt ki baat hai hamein un se koi gila nahin

wo hon aaj hum se KHafa KHafa kabhu hum se un ko bhi pyar tha

wo nagar to kab ka ujaD gaya hum usi nagar se to aae hain

kahin maqbara tha KHulus ka to kahin wafa ka mazar tha

jise shauq tha teri did ka jise pyas thi tere pyar ki

jo teri gali mein muqim tha wahi ajnabi sar-e-dar tha

tere dil se mera KHulus-e-dil na jhalak saka to main kya karun

mere aks ki to KHata na thi tere aaine pe ghubar tha