wo masiha na bana humne bhi KHwahish nahin ki

vo masīhā na banā ham ne bhī ḳhvāhish nahīñ kī

apnī shartoñ pe jiye us se guzārish nahīñ kī

us ne ik roz kiyā ham se achānak vo savāl

dhaḌkaneñ tham sī ga.iiñ vaqt ne jumbish nahīñ kī

kis liye bujhne lage avval-e-shab saare charāġh

āñdhiyoñ ne bhī agarche koī sāzish nahīñ kī

ab ke ham ne bhī diyā tark-e-ta.alluq kā javāb

hoñT ḳhāmosh rahe aañkh ne bārish nahīñ kī

ham to sunte the ki mil jaate haiñ bichhḌe hue log

tū jo bichhḌā hai to kyā vaqt ne gardish nahīñ kī

us ne zāhir na kiyā apnā pashemāñ honā

ham bhī anjān rahe ham ne bhī pursish nahīñ kī

wo masiha na bana hum ne bhi KHwahish nahin ki

apni sharton pe jiye us se guzarish nahin ki

us ne ek roz kiya hum se achanak wo sawal

dhaDkanen tham si gain waqt ne jumbish nahin ki

kis liye bujhne lage awwal-e-shab sare charagh

aandhiyon ne bhi agarche koi sazish nahin ki

ab ke hum ne bhi diya tark-e-talluq ka jawab

honT KHamosh rahe aankh ne barish nahin ki

hum to sunte the ki mil jate hain bichhDe hue log

tu jo bichhDa hai to kya waqt ne gardish nahin ki

us ne zahir na kiya apna pasheman hona

hum bhi anjaan rahe hum ne bhi pursish nahin ki