wo pech-o-KHam jo alag meri rahguzar se tha

vo pech-o-ḳham jo alag merī rahguzar se thā

mujhe ḳhabar hai numāyāñ mire safar se thā

guzar gayā thā kisī raaz kī tarah vo naqsh

dhulā huā jo mirī ḳhāk-e-ḳhair-o-shar se thā

havā ke saath safar kā na hausla thā jise

sabhī ko ḳhauf usī lamha-e-sharar se thā

kanār-e-shām ufuq thā vahī magar vīrān

ḳhalā ke silsila-e-lams ke asar se thā

rukā huā thā ḳhamoshī kī tah meñ sail koī

ḳhatar use bhī mirī tarah bahr-o-bar se thā

mirī nigāh meñ haa.el the barg-o-bār-e-ḳhizāñ

ghirā huā maiñ ajab sāya-e-shajar se thā

wo pech-o-KHam jo alag meri rahguzar se tha

mujhe KHabar hai numayan mere safar se tha

guzar gaya tha kisi raaz ki tarah wo naqsh

dhula hua jo meri KHak-e-KHair-o-shar se tha

hawa ke sath safar ka na hausla tha jise

sabhi ko KHauf usi lamha-e-sharar se tha

kanar-e-sham ufuq tha wahi magar viran

KHala ke silsila-e-lams ke asar se tha

ruka hua tha KHamoshi ki tah mein sail koi

KHatar use bhi meri tarah bahr-o-bar se tha

meri nigah mein hael the barg-o-bar-e-KHizan

ghira hua main ajab saya-e-shajar se tha