yaad kya kya log dasht-e-be-karan mein aae the

yaad kyā kyā log dasht-e-be-karāñ meñ aa.e the

rañg lekin kab ye chashm-e-ḳhūñ-fishāñ meñ aa.e the

kis tamannā se tumheñ dekhā thā kis chāhat se ham

raqs karte halqa-e-vāraftagāñ meñ aa.e the

sūrateñ kyā kyā dil-e-ā.īna-gar meñ bas ga.iiñ

ham se be-sūrat bhī to bazm-e-jahāñ meñ aa.e the

sādgī se ham ne samjhā thā hamārā zikr hai

tazkire kuchh aur hī un ke bayāñ meñ aa.e the

har na.ī mushkil pe ham sochā kiye haiñ der tak

log pahle bhī to kuchh shahr-e-butāñ meñ aa.e the

ye gul-e-tar kī sī ḳhushbū kis taraf se aa ga.ī

ham bagūle the bhalā kab gulsitāñ meñ aa.e the

kyuuñ hamāre saañs bhī hote haiñ logoñ par girāñ

ham bhī to ik 'umr le kar is jahāñ meñ aa.e the

yaad kya kya log dasht-e-be-karan mein aae the

rang lekin kab ye chashm-e-KHun-fishan mein aae the

kis tamanna se tumhein dekha tha kis chahat se hum

raqs karte halqa-e-waraftagan mein aae the

suraten kya kya dil-e-aina-gar mein bas gain

hum se be-surat bhi to bazm-e-jahan mein aae the

sadgi se hum ne samjha tha hamara zikr hai

tazkire kuchh aur hi un ke bayan mein aae the

har nai mushkil pe hum socha kiye hain der tak

log pahle bhi to kuchh shahr-e-butan mein aae the

ye gul-e-tar ki si KHushbu kis taraf se aa gai

hum bagule the bhala kab gulsitan mein aae the

kyun hamare sans bhi hote hain logon par giran

hum bhi to ek 'umr le kar is jahan mein aae the