yahi nahin ki faqat pyar karne aae hain

yahī nahīñ ki faqat pyaar karne aa.e haiñ

ham ek umr kā tāvān bharne aa.e haiñ

vo ek rañg mukammal ho jis se terā vajūd

vo rañg ham tire ḳhāke meñ bharne aa.e haiñ

ThiThur na jaa.eñ ham is ijz kī bulandī par

ham apnī sat.h se nīche utarne aa.e haiñ

ye buuñd ḳhuun kī lauh-e-kitāb-e-ruḳh ke liye

ye til sar-e-lab-o-ruḳhsār dharne aa.e haiñ

lagā rahe haiñ abhī ḳheme ġham kī vaadī meñ

ham is pahāḌ se dāman ko bharne aa.e haiñ

tire laboñ ko milī hai shaguftagī gul kī

hamārī aañkh ke hisse meñ jharne aa.e haiñ

'nisār' band-e-qabā kholnā muhāl na thā

so ham jamāl-e-qabā band karne aa.e haiñ

yahi nahin ki faqat pyar karne aae hain

hum ek umr ka tawan bharne aae hain

wo ek rang mukammal ho jis se tera wajud

wo rang hum tere KHake mein bharne aae hain

ThiThur na jaen hum is ijz ki bulandi par

hum apni sath se niche utarne aae hain

ye bund KHun ki lauh-e-kitab-e-ruKH ke liye

ye til sar-e-lab-o-ruKHsar dharne aae hain

laga rahe hain abhi KHeme gham ki wadi mein

hum is pahaD se daman ko bharne aae hain

tere labon ko mili hai shaguftagi gul ki

hamari aankh ke hisse mein jharne aae hain

'nisar' band-e-qaba kholna muhaal na tha

so hum jamal-e-qaba band karne aae hain