یقین ہے کہ وہ میری زباں سمجھتا ہے

یقین ہے کہ وہ میری زباں سمجھتا ہے

مگر زباں کے اشارے کہاں سمجھتا ہے

فراز دار کو جو آسماں سمجھتا ہے

اسے بھی کب یہ علوئے مکاں سمجھتا ہے

اسے پتا ہے کہ رکتی نہیں ہے چھانو کبھی

تو پھر وہ ابر کو کیوں سائباں سمجھتا ہے

طلسم خواب ہوا پاش پاش کب کا مگر

حقیقتوں کو وہ پرچھائیاں سمجھتا ہے

اسے یہ رشتۂ آب و سراب لا یعنی

کہ وہ ظہور و خفا کی زباں سمجھتا ہے

یہ دل کی آگ بجھی ہے کہ شمع جاں ہوئی گل

جو میرؔ پردۂ شب کو دھواں سمجھتا ہے

تمام لفظ کھڑے چیختے ہیں اور سلیمؔ

خموشیوں کو وفور بیاں سمجھتا ہے