ye jis ne jaan di hai nan dega

ye jis ne jaan dī hai naan degā

diyā hai jis ne sar sāmān degā

mizha se us kamāñ-abrū kī bachnā

vo nāvak hai kaleja chhān degā

mashaqqat se vo de yā be-mashaqqat

ba-har-sūrat ba-har-unvān degā

vo bosa de ke dil le kar ye bole

evaz ehsāñ kā kyā insān degā

milegā qadr-dān-e-ishq ham ko

ḳhudā mā'shūq bā.īmān degā

suneñge tab butān-e-hind apnī

ijāzat jab unheñ shaitān degā

fasāna kohkan kā sun ke bole

jo 'āshiq hogā vo hī jaan degā

na thī ummīd tujh se qāsim baḳht

dil-e-pur-dard o pur-armān degā

rah-e-ulfat kā huuñ kār-āzmūda

kisī ko dil koī anjān degā

chalegā tiir jab apnī du'ā kā

kaleje dushmanoñ ke chhān degā

muqaddar se ziyāda ek luqma

gadā kyā legā kyā sultān degā

lipaT jā.ūñgā un se roz-e-vaslat

agar mujh ko ḳhudā ausān degā

na phailā 'muntahī' dast-e-havas ko

vagarna ye tujhe nuqsān degā

ye jis ne jaan di hai nan dega

diya hai jis ne sar saman dega

mizha se us kaman-abru ki bachna

wo nawak hai kaleja chhan dega

mashaqqat se wo de ya be-mashaqqat

ba-har-surat ba-har-unwan dega

wo bosa de ke dil le kar ye bole

ewaz ehsan ka kya insan dega

milega qadr-dan-e-ishq hum ko

KHuda ma'shuq baiman dega

sunenge tab butan-e-hind apni

ijazat jab unhen shaitan dega

fasana kohkan ka sun ke bole

jo 'ashiq hoga wo hi jaan dega

na thi ummid tujh se qasim baKHt

dil-e-pur-dard o pur-arman dega

rah-e-ulfat ka hun kar-azmuda

kisi ko dil koi anjaan dega

chalega tir jab apni du'a ka

kaleje dushmanon ke chhan dega

muqaddar se ziyaada ek luqma

gada kya lega kya sultan dega

lipaT jaunga un se roz-e-waslat

agar mujh ko KHuda ausan dega

na phaila 'muntahi' dast-e-hawas ko

wagarna ye tujhe nuqsan dega