ye kya ki faqat apni hi taswir banao

ye kyā ki faqat apnī hī tasvīr banāo

ai naqsh-garo vus.at-e-fan kuchh to dikhāo

khultā nahīñ kyā lāla-o-gul soch rahe haiñ

kuchh tum hī kaho fasl-e-bahārāñ kī havāo

chhā jaa.e na ehsās pe zulmat shab-e-ġham kī

yaaro dil-e-sozāñ kī na qindīl bujhāo

har sub.h mire ḳhvāb se gul-gūna talab hai

har shaam ko zid hai ki mujhe ġhāza lagāo

rangīn hai dāmān-e-sahar kis ke lahū se

ḳhāmosh ho kyoñ dār-o-rasan kuchh to batāo

ye farsh-nashīñ arsh-nashīñ to nahīñ 'shiblī'

sar dil kī bulandī hai na qadmoñ pe jhukāo

ye kya ki faqat apni hi taswir banao

ai naqsh-garo wusat-e-fan kuchh to dikhao

khulta nahin kya lala-o-gul soch rahe hain

kuchh tum hi kaho fasl-e-bahaaran ki hawao

chha jae na ehsas pe zulmat shab-e-gham ki

yaro dil-e-sozan ki na qindil bujhao

har subh mere KHwab se gul-guna talab hai

har sham ko zid hai ki mujhe ghaza lagao

rangin hai daman-e-sahar kis ke lahu se

KHamosh ho kyon dar-o-rasan kuchh to batao

ye farsh-nashin arsh-nashin to nahin 'shibli'

sar dil ki bulandi hai na qadmon pe jhukao