ye sahra bas abhi gulzar ho jaane hi wala hai

ye sahrā bas abhī gulzār ho jaane hī vaalā hai

koī tūfāñ nahīñ to qāfila aane hī vaalā hai

zarā Thahro use aane do us kī baat bhī sun leñ

hameñ jo ilm hai go dil ko dahlāne hī vaalā hai

samundar meñ jazīre haiñ jazīroñ par hai ābādī

abhī ik shor bas kānoñ se Takrāne hī vaalā hai

havā-e-fasl-e-gul meñ shorish-e-bād-e-ḳhizāñ bhī hai

kalī khiltī hai ya.anī phuul murjhāne hī vaalā hai

kahāñ jāoge kis ḳhāk-e-tamannā kī havas meñ ho

tumhārī raah kā har moḌ vīrāne hī vaalā hai

vahī ġharqāb hoñge ham vahī kashtī na Dūbegī

agarche nāḳhudā is sach ko jhuTlāne hī vaalā hai

ye sahra bas abhi gulzar ho jaane hi wala hai

koi tufan nahin to qafila aane hi wala hai

zara Thahro use aane do us ki baat bhi sun len

hamein jo ilm hai go dil ko dahlane hi wala hai

samundar mein jazire hain jaziron par hai aabaadi

abhi ek shor bas kanon se Takrane hi wala hai

hawa-e-fasl-e-gul mein shorish-e-baad-e-KHizan bhi hai

kali khilti hai yani phul murjhane hi wala hai

kahan jaoge kis KHak-e-tamanna ki hawas mein ho

tumhaari rah ka har moD virane hi wala hai

wahi gharqab honge hum wahi kashti na Dubegi

agarche naKHuda is sach ko jhuTlane hi wala hai