yun chaar din ki bahaaron ke qarz utare gae

yuuñ chaar din kī bahāroñ ke qarz utāre ga.e

tumhāre ba.ad ke mausam faqat guzāre ga.e

zarā sī duur to sailāb ke sahāre ga.e

bhañvar meñ uljhe to phir haath paañv maare ga.e

sadā kā der talak gūñjnā bahut bhāyā

phir ek naam bayābāñ meñ ham pukāre ga.e

chhupā chhupā ke jo rātoñ ne ḳhvāb rakkhe the

vo saare din ke ujāloñ ke haath maare ga.e

kuchh ek chehre mirī chashm-e-tar meñ tairte haiñ

kuchh ik safīne abhī tak na paar utāre ga.e

yun chaar din ki bahaaron ke qarz utare gae

tumhaare baad ke mausam faqat guzare gae

zara si dur to sailab ke sahaare gae

bhanwar mein uljhe to phir hath panw mare gae

sada ka der talak gunjna bahut bhaya

phir ek nam bayaban mein hum pukare gae

chhupa chhupa ke jo raaton ne KHwab rakkhe the

wo sare din ke ujalon ke hath mare gae

kuchh ek chehre meri chashm-e-tar mein tairte hain

kuchh ek safine abhi tak na par utare gae