yun zamane mein mera jism bikhar jaega

yuuñ zamāne meñ mirā jism bikhar jā.egā

mire anjām se har phuul nikhar jā.egā

jaam ḳhālī hai surāhī se lahū bahtā hai

aaj kī raat vo mahtāb kidhar jā.egā

sail-e-girya mirī āñkhoñ se ye kah jaatā hai

bastiyāñ ro.eñ to diyā bhī utar jā.egā

to koī abr-e-guhar-bār samundar ke liye

dil ke sahrā se jo chup-chāp guzar jā.egā

aaj ye zulf-e-pareshāñ hai zamāne ke liye

kal yahī daur kisī taur sañvar jā.egā

terī har baat pe mar jaatā huuñ martā bhī nahīñ

ki mirī maut meñ insāñ koī mar jā.egā

ashk motī se bikhar jā.eñge rāhoñ meñ jahāñ

sū-e-manzil bhī mirā dīda-e-tar jā.egā

maiñ makīñ huuñ na makāñ shahr-e-mohabbat kā 'zafar'

dil musāfir na kisī ġhair ke ghar jā.egā

yun zamane mein mera jism bikhar jaega

mere anjam se har phul nikhar jaega

jam KHali hai surahi se lahu bahta hai

aaj ki raat wo mahtab kidhar jaega

sail-e-girya meri aankhon se ye kah jata hai

bastiyan roen to diya bhi utar jaega

to koi abr-e-guhar-bar samundar ke liye

dil ke sahra se jo chup-chap guzar jaega

aaj ye zulf-e-pareshan hai zamane ke liye

kal yahi daur kisi taur sanwar jaega

teri har baat pe mar jata hun marta bhi nahin

ki meri maut mein insan koi mar jaega

ashk moti se bikhar jaenge rahon mein jahan

su-e-manzil bhi mera dida-e-tar jaega

main makin hun na makan shahr-e-mohabbat ka 'zafar'

dil musafir na kisi ghair ke ghar jaega