zulf ko abr ka TukDa nahin likhkha maine

zulf ko abr kā TukḌā nahīñ likhkhā maiñ ne

aaj tak koī qasīda nahīñ likhkhā maiñ ne

jab muḳhātab kiyā qātil ko to qātil likhkhā

lakhnavī ban ke masīhā nahīñ likhkhā maiñ ne

maiñ ne likhkhā hai use maryam o siitā kī tarah

jism ko us ke ajantā nahīñ likhkhā maiñ ne

kabhī naqqāsh batāyā kabhī me.amār kahā

dast-e-fankār ko kaasa nahīñ likhkhā maiñ ne

tū mire paas thā yā terī purānī yādeñ

koī ik sher bhī tanhā nahīñ likhkhā maiñ ne

niiñd TuuTī ki ye zālim mujhe mil jaatī hai

zindagī ko kabhī sapnā nahīñ likhkhā maiñ ne

merā har sher haqīqat kī hai zinda tasvīr

apne ash.ār meñ qissa nahīñ likhkhā maiñ ne

zulf ko abr ka TukDa nahin likhkha main ne

aaj tak koi qasida nahin likhkha main ne

jab muKHatab kiya qatil ko to qatil likhkha

lakhnawi ban ke masiha nahin likhkha main ne

main ne likhkha hai use maryam o sita ki tarah

jism ko us ke ajanta nahin likhkha main ne

kabhi naqqash bataya kabhi meamar kaha

dast-e-fankar ko kasa nahin likhkha main ne

tu mere pas tha ya teri purani yaaden

koi ek sher bhi tanha nahin likhkha main ne

nind TuTi ki ye zalim mujhe mil jati hai

zindagi ko kabhi sapna nahin likhkha main ne

mera har sher haqiqat ki hai zinda taswir

apne ashaar mein qissa nahin likhkha main ne