زیر نظر محشر آفریدی کا شعری مجموعہ ہے۔ اس کی خاص بات یہ ہے کہ جو لوگ اردو کو روانی سے پڑھ نہیں سکتے، ایسے لوگوں کے لئے اشعار کو اردو کے ساتھ ساتھ ہندی رسم الخط میں بھی پیش کیا گیا ہے۔ مطالعہ کرنے کے بعد معلوم ہوگا کہ اس کتاب کی پوری شاعری میں فرسودہ خیالات سے گریز کرتے ہوئے خودداری اور آزادی کی ایک نئی لکیر کھینچی گئی ہے اور مخصوص تراکیب و لفظیات سے نئی جہتیں تلاش کرنے کی کوشش کی گئی ہے۔ اس مجموعے میں غزل کی روایت اور اس کے قدیم رنگ کو نئے لہجے میں دوبارہ زندہ کیا گیا ہے۔ قاری اس مجموعے کے اشعار کو پڑھتے ہوئے محسوس کریں گے کہ ہر غزل میں ان احساس کی ترجمانی ہورہی ہے۔

محشر آفریدی صاحب 15جنوری کو انڈیا کے شہر روڈکی میں پیدا ہوئے اور تا حال آپ روڈکی میں ہی مقیم ہیں۔ شاعری کا آغاز 1990 میں کیا اورمشاعروں میں شرکت 1994میں کی۔ جناب محشر آفریدی کی شاعری کا مزاج منفرد ہے آپ اپنی شاعری میں عوام کے مسائل کو اجاگر کرتے ہیں۔ آپ انڈیا کےعلاوہ متحدہ عرب امارات، قطر،اور بحرین کی طرف کئی ادبی سفرکر چکے ہیں۔