مرثیہ کاشمارمذہبی شاعری میں کیا جاتا ہے،حضرت حسان بن ثابتؓ نے حضور ﷺ کی وفات پر بڑے دردناک پیرائے میں مرثیہ کہاتھا ،مرثیہ میں واقعات کربلا کا تذکرہ اس انداز سے کیاجائے کہ سننے والے پر رقت طاری ہوجائے اور وہ بے اختیار رونے لگے،زیر نظر کتاب میں ام ہانی اشرف نے مرثیہ کے اہم شعرااور اہم بنیادی باتوں کو ایک کتاب میں سمو دیا ہے جس کے لئے مصنفہ نے اردو ادب کے مؤقر ادبا کے مضامین کو شامل کیا ہے، کتاب میں موجود مضامین من وعن اور ہو بہو نہیں پیش کئے گئے ہیں بلکہ مواد کی جامعیت کی خاطر مصنفہ نے بہت سے مضامین کے انھیں خاص خاص حصوں کو پیش کیا ہے جو کافی دل چسپ اور معلوماتی تھے، کتاب میں نور الحسن نقوی، نصیر الدین ہاشمی، سیدہ جعفر ، سید مسعود حسن رضوی ادیب ،اور ڈاکٹر ابوالیث صدیقی و دیگر معتبر محققین کے مضامین شامل ہیں، کتاب کے شروع میں "ابتدائیہ"کے عنوان سے مصنفہ کا لکھا ہوانہایت اہم مضمون، مرثیہ کی بنیادی باتوں پر مشتمل ہے۔