اڑیسہ میں اردو زبان میں شاعری کرنے والوں کی ایک خاصی تعداد موجود ہے۔ اگرچہ یہاں کی مقامی زبان اڑیا ہے اور اس زبان میں بہترین شاعری موجود ہے مگر چیدہ چیدہ لوگ اردو زبان بھی بولتے اور لکھتے ہیں۔ اس تذکرہ میں انہیں اردو زبان کے شعرا کا تذکرہ پیش کیا گیا ہے۔ اس کے حصہ اول میں جن پرانے شعرا کا کلام شامل ہے انہوں نے اپنے جذبات کو شاعری کا جامہ پہنا کر اپنے احساسات کو اشعار میں باندھا ہے جس سے ان کا کلام گاؤں گاؤں میں مقبول ہوا ہے۔ جس میں مذہبی شاعری اور نعتیہ شاعری کافی حد تک دیکھنے کو ملتی ہے۔ جن میں چرخی، معلم سنبل پوری، عبد المجید بھویاں، عبد العزیز عاشق، نور علی انور، عبد الستار عبد جیسے اہم شعرا شامل ہے۔ اس کے بعد امجد نجمی سے اڑیسہ کی شاعری کا نیا باب شروع ہوتا ہے اور انہیں اڑیسہ کا سب سے پہلا نظم گو شاعر کہا جا سکتا ہے۔ حصہ سوم بھی نہایت ہی اہمیت کا حامل ہے جس میں کچھ جدید شعرا کا کلام نمونے کے طور پر پیش کیا گیا ہے۔ اس کتاب میں شعرائے اڑیسہ کا منتخب کلام مع تعارف پیش کیا گیا ہے۔