کشور ناہید پاکستان کی ادبی حلقوں میں ایک نمایاں مقام رکھتی ہیں ۔وہ اپنے تانیثی خیالات اور مذہبی کٹرپن کی مخالفت کے لئے مشہور ہیں۔ بہت نڈر ادیبہ ہیں۔ انہوں نے مارشل لا کے زمانے میں بھی اپنی شاعری کی دھار کو ماند نہیں پڑنے دیا۔ موصوفہ عرصہ تک روزنامہ جنگ میں کالم لکھتی رہیں۔ پاکستان نیشنل کونسل آف آرٹس کی ڈائریکٹر جنرل کے عہدے پر کام کرتی رہی ہیں۔ا نہیں " ستارۂ امتیار" کے علاوہ متعدد ایورڈ مل چکے ہیں ۔ ان کا اولین شعری مجموعہ "لب گویا" کو خوب پذیرائی ملی ۔ ان کا یہ مختصر سا شعری مجموعہ جس کا آپ اس وقت مطالعہ کررہے ہیں ،اس میں نہ کوئی دیباچہ شامل کیا گیا ہے اور نہ کتاب کا انتساب کسی فرد کے نام کیا گیا ہے۔ پہلی نظم " خواہش " کو اس کا پیش لفظ سمجھ کر مطالعہ آگے بڑھا یا جا سکتا ہے ۔ اس مجموعے میں نظمیں بھی ہیں اور غزلیں بھی۔ کتاب کی نطموں میں زندگی کے سارے موضوعات اور مسائل پر کمنٹ کیا گیا ہے اور احساس دلایا گیا ہے کہ ایک لکھاری کو کتنا بے باک ہونا چاہئے ۔ ٹائیٹل کی دلکشی سے نظر نہیں ہٹیتی ۔ البتہ پس سروق پر مصنفہ کی رنگین تصویر میں وہ کسی گہری سوچ میں غوطہ زن نظر آتی ہیں۔

نام کشور ناہید اور تخلص ناہید ہے۔ ۳؍فروری ۱۹۴۰ء کو بلند شہر(یوپی) میں پیدا ہوئیں۔ایم اے (معاشیات) پاس کیا۔محکمہ اطلاعات ونشریات کے ادبی مجلہ’’ماہ نو‘‘ کی چیف اڈیٹر کے منصب پر فائز رہیں۔ بعدازاں پاکستان نیشنل سنٹر ، لاہور کی ریزیڈنٹ ڈائرکٹر رہیں۔ ڈائرکٹر مرکزی اردو سائنس بورڈ، لاہور کے عہدے پر بھی فائز رہیں۔ ا ن کی تصانیف کے چند نا م یہ ہیں: ’’لب گویا‘‘(غزلیات)، ’’بے نام مسافت‘‘(نظمیں)، ’’گلیاں،دھوپ،دروازے‘‘(نظمیں، نثری نظمیں ،غزلیں)، ’’فتنہ سامانی دل‘‘، ’’علامتوں کے درمیاں‘‘، ’’سیاہ حاشیے میں گلابی رنگ‘‘، ’’ناوک دشنام‘‘، ’’عورت، خواب اور خاک کے درمیان‘‘، ’’خیالی شخص سے مقابلہ‘‘، ’’بری عورت کی کتھا‘‘(خودنوشت حالات زندگی)، ’’نازائیدہ بیٹی کے نام‘‘، ’’شناسائیاں، رسوائیاں‘‘۔ ’لب گویا‘ پر ۱۹۶۹ء کا آدم جی ادبی انعام ملا۔ حکومت پاکستان نے ان کی ادبی خدمات کے اعتراف میں انھیں حسن کارگردگی کے تمغے سے نوازا۔ بحوالۂ:پیمانۂ غزل(جلد دوم)،محمد شمس الحق،صفحہ:344