مجنوں گورکھپوری اردو کے نامور ناقدوں میں شمار کیے جاتے ہیں۔ تحقیق سے بھی ان کا گہرا شغف رہا ہے اور موضوع کے تحت ان کی متعدد تحریرں ہیں، تاہم زیر نظر کتاب ’افسانہ‘ بظاہر افسانہ نگاری کی جانب توجہ مائل کرتی ہے مگر کتاب دراصل تنقید سے وابستہ ہے۔ اس میں انہوں نے افسانہ نویسی کی فن، تکنیک اور اجزائے ترکیبی وغیرہ کے جائزہ سے متعلق مقالے تحریر کیے ہیں۔

مجنوں گورکھپوری اردو کے ممتاز ترین نقاد ، شاعر، مترجم اور افسانہ نگار ہیں ، انہوں نے ترقی پسند ادب کوتنقیدی سطح پر نظریاتی بنیادیں فراہم کرنے میں اہم کردار ادا کیا ۔ مجنوں کی پیدائش ۱۰  ملکی جوت ضلع بستی میں ایک زمیندار گھرانے میں ہوئی ۔ مجنوں کے والد فاروق دیوانہ بھی شاعر تھے اور علی گڑھ مسلم یونیورسٹی میں ریاضی کے پروفیسر تھے ۔ مجنوں کی ابتدائی تعلیم منجھر گاؤں میں ہوئی ۔ اوائل عمری میں ہی عربی ، فارسی اور ہندی میں دسترس حاصل کرلی تھی ۔ درس نظامیہ کی تکمیل کے بعد بی ، اے تک کی تعلیم گورکھپور ، علی گڑھ اور الہ آباد میں مکمل کی ۔ ۱۹۳۴ میں آگرہ یونیورسٹی سے انگریزی میں اور ۱۹۳۵ میں کلکتہ یونیورسٹی سے اردو میں ایم ،اے کیا اور علی گڑھ مسلم یونیورسٹی میں درس وتدریس سے وابستہ ہوگئے ۔