نامور شاعر ، ممتاز سفر نامہ نگار اور منفرد کالم نگار جمیل الدین عالی اردو ادب کا بے حد معتبر نام ہے۔ انہوں نے غزل اور نظم گوئی کے میدان میں مسلسل لکھا اور بہت جم کر لکھا۔ ان کا طویل نظم کا تجربہ بھی عصری شعری منظر نامے میں بہت منفرد اور نمایاں تر مقام کا حامل رہے گا۔ عالی صاحب دو ہے اور گیت نگاری کے میدان میں جداگانہ اسلوب کے حامل ایسے شاعر ہیں جنہیں الگ شناخت کیا جا سکتا ہے۔ عالی صاحب کے لکھے ہوئے قومی نغمے پاکستان کے باسیوں میں حب وطن کا لازوال جذبہ پیدا کرتے رہے اور عوامی مقبولیت کے اس مقام پر ہیں جہاں لوک ادب کی سرحدیں شروع ہوتی ہیں۔ ان حوالوں سے پاکستان کی آئندہ نسلیں بھی ان کی احسان مند رہیں گی۔ زیر نظر کتاب جمیل الدین عالی کی شخصیت اور فن پر ایک مبسوط کتاب ہے ، جس میں شامل مضامین ان کی ادبی کاوشوں کا جائزہ پیش کرتے ہیں۔اس کتاب میں شامل مضامین مختلف مکاتب فکر کے ادیبوں کے ہیں جن سے عالی کی اکوشوں ،کارناموں ،خامیوں اور ناکامیوں کا بے لاگ جائزہ لیا گیا ہے۔