اشوک اعظم ہندوستان کا معروف بادشاہ ہے جس کے عہد کو ہندوستان کا زرین عہد کہا جا تا ہے۔ اس نے عہد قدیم میں پہلی دفعہ بھارت کو متحد کرکے ایک ایسی سلطنت قائم کی جس کی نظیر مغلوں سے پہلے تک نہیں ملتی ہے۔ اشوک کے ذریعہ بدھ دھرم کا پرچار نہ صرف ہندوستان بلکہ دیگر ممالک میں بھی ہوا۔ اس کے بہت سے کتبہ اور آثار پورے برصغیر میں بکھرے ہوئے ہے ہیں۔ اشوک نے اپنے کتبوں میں مختلف اخلاقی و مذہبی احکام رعایا کے لیے لکھے ہیں۔ اشوک کی حکومت شمال مغرب میں کوہ ہندو کش تک پہنچی ہوئی تھی۔ اس میں ایک بڑا حصہ اس علاقہ کا بھی شامل تھا۔ جو آج کل افغانستان میں شامل ہے اور ساتھ ہی بلوچستان اور سندھ کا تمام یا بڑا حصہ بھی اس سے ملحق تھا۔ سوات اور باجور کی دور افتادہ وادیاں بھی شاہی اعمال کی زیر نگرانی تھیں اور ان کے علاوہ کشمیر اور نیپال بھی شامل تھے۔ زیر نظر کتاب میں اسی اشوک اعظم کی سوانح اور تاریخی حالات بچوں اور بچیوں کے لئے بیان کئے گئے ہیں۔ ساتھ ہی ساتھ انتظام سلطنت، تہذیب و تمدن، اشوک کے کتبے اور ان کے موضوعات وغیرہ پر روشنی ڈالی گئی ہے۔ کتاب کی زبان آسان اور انداز بیان بالکل سادہ ہے تاکہ بچے ٹھیک سے استفادہ کرسکیں۔