آزادی سے قبل ملک کے حالات کیا تھے، اس موضوع پر بہت سی کتابیں دستیاب ہیں، آزادی کے بعد ملک میں پیدا ہوئے مسائل پر بھی تحریروں کی کمی نہیں ہے۔ باوجود اس کے زیر نظر کتاب ’آزادی کی چھاؤں میں‘ میں انیس قدوائی نے جن مسائل کی طرف توجہ دلانے کی کوشش کی ہے ظاہر ہے یہ وہ مسائل ہیں جن کا پیدا ہونا فطری تھا۔ مگر ملک کے لیڈران ہوں کہ سیاسی کارکنان کسی کے پاس اتنی سکت نہ تھی کہ وہ ان کا فوری حل تلاش کرسکیں۔ انیس قدوائی نے اس کتاب میں آزادی کے بعد یکلخت پھوٹ پڑنے والے مسائل کے متعلق نہ صرف اپنے گہرے تجربے کا اظہار کیا ہے بلکہ کتاب میں شامل مختلف مضامین کے ذریعے ان مسائل اور ان سے پیدا ہوئی افراتفری کا نقشہ کچھ اس انداز میں کھینچا ہے جسے پڑھتے ہوئے معاصر صورتحال کا منظر نگاہوں میں پھرنے لگتا ہے۔ اپنی تگ ودو اور بابائے قوم کرم چند گاندھی سے اپنے والہانہ پن کا بھی بے ساختہ اظہار کیا ہے۔

انیس قدوائی ادیبہ اور مشہور سماجی کارکن تھیں۔ بارہ بنکی کے مشہور نیشنلسٹ قدوائ خاندان سے تعلق رکھتی تھیں۔ 1956 سے 1968 تک راجیہ سبھا کی ممبر رہیں۔ ان کے والد شیخ ولایت علی وکیل تھے اور ولایت علی بمبوق کے نام سے مولانا محمد علی کے اخبار’کامریڈ‘ اور ’نیو ایرا‘ میں مزاحیہ کالم لکھتے تھے۔
انیس قدوائ نے گھر ہی پر رہ کر اردو اور انگریزی سیکھی ۔ تقسیم ہند کے بعد فرقہ وارانہ فسادات میں ان کے شوہر شفیع احمد قدوائ کے مارے جانے  کے بعد گاندھی جی کی رہنمائ میں انیس قدوائ نے خود کو فلاحی کاموں کے لئے وقف کردیا۔ پردہ ترک کرکے سبھدرا جوشی کے ساتھ فسادات میں مغویہ عورتوں اور لاوارث بچوں کو بلا تفریق مذہب و ملت تحفظ دینے کے لئے سینٹر قائم کئے۔ انیس قدوائ کی مشہور کتاب ’’آزادی کی چھاوّں میں‘‘ ان کے فلاحی کاموں کے حوالے سے ہندوستان کی جد وجہد آزادی اور تقسیم ہند کے بارے میں ایک تاریخی اور سماجی دستاویز مانی جاتی ہے۔ اس کا ترجمہ انگریزی میں بھی ہوا ہے۔
ان کی دو اور کتابیں ’نظرے خوش گذرے ’ اور ’اب جن کے دیکھنے کو‘ ادبی مضامین اور خاکوں پر مشتمل ہیں۔ ان کا طرز تحریر  بہت رواں اور شگفتہ ہے۔