تاریخ کے منظرنامے پر 1857ء کی جنگِ آزادی کے مناظر جابجا بکھرے ہوئے ہیں۔ اس میں سے ایک منظر کی لوح پر "بہادر شاہ ظفر" لکھا ہے۔ وہ مغل سپوت، جس کے ہاتھ سے بیاض لے لی گئی اور حالات نے سر پر تاج پہنا دیا۔ وہ مغل روایتوں کا امین تھا، مروت اور طرح داری آڑے آئی، انقلاب سے غدر تک آتے ہوئےان سے ایک ایک کرکے سب کچھ چھین لیا گیا، اس کتاب میں بہادر شاہ ظفر کے عہد کی تاریخ بیان کی گئ ہے، بہادر شاہ ظفر اور ان کا عہد ، 1857 کی پر آشوب تحریک کی مستند اور مکمّل و مفصّل تاریخ رئیس احمد جعفری کی یہ کتاب کافی مشہور ہوئی ، اس کتاب میں رئیس جعفری نے غدر کے زمانے کے حالات اور بہادر شاہ ظفر کے کارناموں کو بیان کیا ہے ،یہ کتاب گویا کہ بہادر شاہ ظفر کے عہد کی ایک مفصل تاریخ ہے، جس کو تحریر کرتے ہوئے مصنف نے نہایت ہی معتبر اور جامع کتابوں کا سہارا لیا ، چونکہ غدر کے وقت بہادر شاہ ظفر تقریبا 82 سال کے تھے، اور غدر کے بعد انگریزوں کے ظالمانہ رویوں کی وجہ سے لوگ درست بات کہنے سے ڈرتے تھے، اس لیے زیادہ تر کتابوں میں انگریزوں کے خوف کی وجہ سے ان کی تعریف و توصیف ہی ملتی ہے، تاہم اس کتاب میں رئیس جعفری نے بڑی جرات کا ثبوت پیش کرتے ہوئے، اس عہد کی تمام سچائیوں کو اجاگر کیا ہے ۔

مولانا رئیس احمد جعفری 1912 میں لکھیم پور میں پیدا ہوئے. اصل وطن سیتا پور تھا. ان کا خاندان یہاں کے عمائد میں شمار ہوتا تھا. جعفری صاحب چار پانچ برس کے ہی تھے کے ان کے والد سید ناظر حسین کا انتقال ہو گیا. اسی کی وجہ سے ان کی پرورش و تربیت ننھیال (خیرآباد) میں ریاض خیرآبادی کی سرپرستی میں ہوئی جو جعفری صاحب کے نانا سید نیازاحمد کے حقیقی بھائی تھے۔

جعفری صاحب نے ندوۃالعلماء لکھنو اور جامع ملیہ اسلامیہ دہلی میں تعلیم حاصل کی. طالب علمی ہی کے زمانے میں مضمون نگاری کا شوق پیدا ہوا. ان کی پہلی کتاب “سیرت محمد علی” ہے. یہ اگر چہ نوجوانی کے زمانے کی تصنیف ہے لیکن آج بھی اپنے موضوع پر بہترین کتاب سمجھی جاتی ہے۔

اپنی زندگی کے آخری ایام میں انہوں نے کچھ عرصے کے لئے روزنامہ “انجام” کراچی کی ادارت کے فرائض بھی انجام دئیے. ان کا انتقال 27 اکتوبر 1968 کو لاہور میں ہوا. اور تدفین کراچی میں ہوئی۔

جعفری صاحب نے متنوع موضوعات پر تین سو سے زائد کتابیں تصنیف و تالیف کیں. ایک خاصی تعداد ناولوں اور ترجموں کی بھی ہے. وہ عملی و ادبی حلقوں ہی میں نہیں, عوامی حلقوں میں بھی مقبول ترین ادیب تھے۔