مولانا امام علی دانش کی پیدائش موضع راے پور گھنسی جو سکندرآباد کے قریب گولا روڈ پر ایک گاوں ضلع لکھیم پور کھیری میں ہوئی۔ تعلیم دارالعلوم دیوبند سے حاصل کی بعد ازآں وہ بالآخر مدرسہ ادارہ محمودیہ قصبہ محمدی کھیری میں تدریس کی خدمات انجام دیتے رہے وہ مدرسہ نسواں محمدی کے شیخ الحدیث بھی تھے اور فقہ حنفی کے ماہر بھی ان کا عہد ادارہ محمودیہ کا زرین عہد تھا کیوں کہ اس دور میں ایک طرف حکیم نوشہ میاں مدرسے کے منتظم اور منطق و سیاسیات کےامام تھے تو اسی دور میں مولانا ذکی اللہ نحو و صرف نیز فقہ کے بے عدیل استاد تھے اور مولانا مجید اللہ صاحب کی الگ ہی صلاحیت تھی۔ مولانا امام علی دانش منکسر المزاج اور فرشتہ صفت انسان واقع ہوئے تھے مگر قدرت کی کرشمہ سازی کہ کچھ وجوہات کے چلتے ان کو محمدی اور ادارہ محمودیہ دونوں چھوڑ کر قصبہ پھول بہڑ جاکر گم نامی کی زندگی بسر کرنی پڑی اور ایک چھوٹے سے مدرسے میں پڑھاتے رہے اور اسی رنج و بے چینی میں ان کی وفات ہو گئی ان کی قبر قصبہ پھل بہڑ ضلع لکھیم پور میں واقع ہے۔