شاعری کے میدان میں جس طرح سے مردوں نے اسے اپنی موزونی طبع کے اعتبار سے مختلف ڈھانچوں میں ڈھال کر دنیا کو مسحور کیا ہے اسی طرح سے ہماری خواتین نے بھی اپنی رنگینی طبع کی بدولت اپنے مزاج کے مطابق موزوں کیا ہے۔ یوں تو دنیا کے ہر ادب میں خواتین شاعرات کی گنتی خاصی تعداد میں موجود ہے مگر اردو زبان میں یہ سلسلہ کافی دیر میں شروع ہوا یہ کہنا کچھ حد تک درست ہو سکتا ہے، کیوں کی اردو زبان میں شعر کہنے والی شاعرات کو ابتدا میں یک سر مسترد کر دیا گیا مگر انہوں نے اپنی جد و جہد کو جاری رکھا جس کے نتیجے میں ایک وقت ایسا آیا جب ان کو صف اول کے شاعروں میں جگہ ملی۔ احساسات قلب شاعری کا اہم حصہ ہے مگر عورتوں کی حسیات کے پہلوں کو منظر عام تک آنے میں کافی عرصہ صرف ہوگیا۔ زیر نظر "چند شاعرات راجستھان" کو شاہد ماہلی نے مرتب کیا ہے۔ اس تذکرے میں راجستان کی شاعرات کا ذکر کیا گیا ہے جنہوں نے اپنی شاعری میں اپنے احساسات کو سمویا ہے اور ان احساسات کی مہک سے اپنے قارئین کو اپنا گرویدہ بنا لیا۔ تذکرے میں شاعرات کے احوال اور ان کے نمونہ کلام کو درج کیا گیا ہے جو نہایت ہی اہمیت کےحامل ہیں۔