اس کتاب کی مصنفہ پاکستان کی مشہور شاعرہ ، ناول نگار اور افسانہ نگار تھیں۔ ان کی ۲۰ سے زیادہ کتابیں مختلف اصناف میں شائع ہو چکی ہیں ۔ان کی لکھی ہوئی کہانی پر "ناگ منی " فلم بھی بنی ہے۔ ان کی زیر نظر یہ کتاب دس ابواب پر مشتمل ہے اور ہر باب اپنی جگہ ایک مکمل افسانہ ہے۔ یہ تمام افسانے "چلمن لاہور" میں شائع ہو کر اپنی افادیت تسلیم کرا چکے ہیں ۔ یہ افسانے دراصل آپ بیتیاں ہیں ان چار عورتوں اور چار مردوں کی جن کے تجربات اور حالات الگ الگ ہیں۔ مگران سب کا ماحول اسی دور کا ہے جس میں ہم سانس لے رہے ہیں۔ اس میں چار کہانیاں ایک دور کی ہیں جن سے چار نوجوان لڑکے پرانی فلموں سے اخلاقیات کا سبق لیتے ہیں اور عہد کرتے ہیں کہ وہ دس برس بعد اسی جگہ جمع ہوکر اپنی اپنی داستان سنائیں گے اور عملی دنیا میں انہیں اختیار کریں گے ۔ لیکن دس برس کے بعد جب وہ ان خیالات وتہذیب کو لے کر عملی دنیا میں قدم رکھتے ہیں تو پتہ چلتا ہے کہ دنیا بدل چکی ہے اور دس برس کے قلیل عرصے میں زمانہ اتنی ترقی کرچکا ہے کہ عورتیں فطری نسوانیت سے گریزاں ہو گئی ہیں۔ یہ افسانے حقیقی زندگی سے روشناس کراتے ہوئے جینے کے اسباق سکھاتے ہیں۔

وحیدہ نسیم نے عثمانیہ گرلز کالج حیدرآباد دکن سے 1951 میں نباتیات میں ایم ایس سی کیا اور 1952 میں پاکستان منتقل ہوگئیں۔ وہ نباتیاب کی تدریس کے شعبے سے وابستہ تھیں اور 1987 میں کراچی کے ایک کالج سے پرنسپل کی حیثیت سے ریٹائر ہوئی۔ وہ شاعرہ، ناول و افسانہ نگار اور محقق تھیں۔ اپنے زمانے کی بہت مشہور شاعرہ تھیں۔ ترقی پسند دور کے عروج کے زمانے میں شاعری شروع کی تھی۔ ان کی غزلیں اور نظمیں اپنے عہد کی مؤثر اور سچی تصویریں ہیں۔ ان کا ننہیال ہندوستاں کے مشہور قصبےکاکوری میں تھا۔ برسوں بعد جب وہ وہاں گئیں تب انھوں نے‘مرثیہ کارکوری’ لکھا۔ 
متعدد کتابوں کی مصنف ہیں: ’موج نسیم‘، ’نعت و سلام‘، ’مرثیہ کاکوری‘ (شاعری)۔ ’ناگ منی‘ ،’راج محل‘، ’رنگ محل‘ اور’دیپ‘ (افسانوی مجموعے)۔ ’اورنگ آباد: ’ملک عنبر سے اورنگ زیب تک‘، ’عورت اور اردو زبان‘ اور ’شاہان ہے تاج‘ (تنقید)۔ ’داستاں در داستاں‘، ’ساحل کی تمنا‘، ’غم دل کہا نہ جائے‘، ’شبو رانی‘، ’زخم حیات‘ (ناول)۔ انہوں نے پاکستان ٹیلی وژن کے لئے کئی ڈرامے بھی تحریر کئے جبکہ ان کی ایک کہانی پر ناگ منی نامی فلم بھی بنائی گئی تھی۔