شیخ عبد الحق محدث دہلوی مائناز محدث تھے ۔ مذہب اسلام پر بے شمار کتابیں لکھی ہیں۔ آپ کی اس زیر نظر کتاب کا اصل متن فارسی زبان میں "جذب القلوب الی دیار المحبوب " کے نام سے ہے۔ اردو میں دیار المحبوب کے نام سے سلیس اور بامحاورہ ترجمہ کیا گیا ہے ۔اس کتاب میں مدینہ منورہ کے مختلف نام ، اس کی عظمت کا تذکرہ ہے ۔ اس کے علاوہ احادیث سے ثابت اوصاف، قدیم ساکنان مدینہ سے لے کر حضور کی مدینہ آمد تک کے مناظر، مکہ سے مدینہ کی ہجرت راستے کے واقعات اور مدینہ پہنچنے کا منظر،مدینہ منورہ میں مقامات شریفہ، مدینہ کے ائمہ کرام اور امراء اور سلاطین ، روضہ مبارک کی خصوصیات، مسجد قباء کے فضائل اور مقصد تاسیس، مدینے میں پائے جانے والے تاریخی کنویں ،مکہ اور مدینہ کے راستے میں مشہور مکانات، جنت البقیع، احد پہاڑ کے فضائل، زیارت کے فضائل، گنبد خضراء ، آداب زیارت مدینہ منورہ، سید الکونین پردرود کے علاوہ مدینہ منورہ کے بارے میں بہت کچھ جسے پڑھ کر مومن کے دل میں زیارت مدینہ کی تڑپ پیدا ہونا یقینی ہے۔

شیخ عبد الحق محدث دہلوی (نام: عبد الحق، کنیت: ابو المجد، لقب: محدث دہلوی) برصغیر کے جلیل القدر عالمِ دین، محدث، مصنف اور صوفی بزرگ تھے۔ آپ 1 محرم 958ھ / 9 جنوری 1551ء کو دہلی میں پیدا ہوئے۔ والد شیخ سیف الدینؒ صوفی اور شاعر تھے۔ ابتدائی تعلیم والد سے حاصل کی اور کم عمری میں قرآن مجید حفظ کیا۔ پھر اعلیٰ دینی تعلیم کے لیے ماوراء النہر گئے اور بڑے علما سے استفادہ کیا۔ روحانی طور پر سلسلہ قادریہ میں بیعت والد سے، اور سلسلہ نقشبندیہ میں خلافت شیخ خواجہ باقی باللہؒ سے حاصل کی۔ آپ کو حضور غوث اعظمؒ سے غیر معمولی عقیدت تھی۔اکبر بادشاہ کے دور میں ’’دینِ الٰہی‘‘ کے فتنہ کے وقت آپ نے دہلی میں مدرسہ قائم کر کے تدریس اور وعظ کا سلسلہ شروع کیا اور عوام کو صحیح راہ دکھائی۔ تصنیف و تالیف میں آپ نے 134 سے زائد کتابیں لکھیں جن میں اخبار الاخیار، مقدمہ مشکوٰۃ المصابیح، نوریہ سلطانیہ اور متعدد علمی و اصلاحی رسائل شامل ہیں۔ علاوہ ازیں حکمرانوں، علما اور صوفیا کو نصیحت آمیز خطوط بھی لکھے۔شیخ عبد الحق محدث دہلویؒ کا وصال 22 ربیع الاول 1052ھ / 20 جون 1642ء کو دہلی میں ہوا، جہاں ان کا مزار آج بھی مرجعِ خلائق ہے۔ آپ کی علمی و روحانی خدمات نے برصغیر میں دین و فکر پر گہرا اثر ڈالا اور آپ برصغیر کے عظیم محدثین و مصلحین میں شمار ہوتے ہیں۔