عطاء الحق قاسمی کوسفرناموں میں ایک رجحان ساز شخصیت قرار دیا جاتا ہے۔ ان کے سفر ناموں میں طنز و مزاح اور کہانی پن کا خوبصورت امتزاج نظر آتا ہے۔ صحافت سے بھی دلچسپی رکھتے ہیں اور سدا بہار کالم نگار بھی ہیں۔ سیاست میں بھی دلچسپی پائی جاتی ہے۔ ناروے میں پاکستان کے سفیر کی حیثیت سے بھی ذمہ داری نبھا چکے ہیں ۔ ان کے سفر ناموں میں مزاح اورسماجی شعور پایا جاتا ہے۔ ان کے مشہور سفرناموں میں زیر نظر " دنیا خوبصورت ہے " کو بڑی مقبولیت حاصل ہوئی ہے ۔ اس سفر نامے میں انہوں نے بنکاک، سنگاپور، اور برسبین کی شاندار منظر کشی کی ہے۔ کسی بھی شہر کا ذکر کرتے ہوئے وہاں کے مقامی باشندے کا مزاج، رہن سہن اور مذہبی رجحان کے بارے میں ضرور لکھا ہے اور اس جگہ کے کلچر کے بارے میں لکھنا تو ان کے سفر نامے کا لازمی حصہ ہوتا ہے اور یہی وہ حصہ ہے جس میں وہاں کی تمام خوبیاں اور خرایباں نہایت دلچسپ انداز میں شامل کردی جاتی ہیں اور انہیں پڑھنے میں بھی خوب مزہ آتا ہے۔ سفرنامے کی سرخی کچھ ایسی لگائی جاتی ہے کہ پڑھنے والا فطری طور پر اسے پڑھنے پر مجبور ہوجاتا ہے اور جب پڑھنا شروع کرتا ہے تو پڑھتا ہی چلا جاتا ہے ۔