’’فاؤسٹ‘‘ گوئٹے کا ایک عظیم کارنامہ ہے۔ گوئٹے کا شہرہ آفاق منظوم ڈراما فاؤسٹ حصہ اوّل جو اسکی زندگی ہی میں چھپا، دوسرا حصہ اس کی وفات کے ایک سال بعد چھپا۔ ڈراما ’’فاؤسٹ‘‘ انسانی لغزشوں اور ایک انسان کی گمراہی کی کہانی ہے۔ دانش روحانی اقدار، انسانی لغزشوں، پستی، بلندی کا ایک حسین مرکب ہے۔ گوئٹے کے علم، تجربے، مشاہدے اور فلسفیانہ طرز اسلوب نے اسے جرمن ادب کا ایک عظیم شاہکار بنا دیا ہے۔ ’’فاؤسٹ‘‘ کی اپنی محبوبہ مارگریٹ سے گفتگو۔ شیطان سے مکالمے اور خدا کے حضور فاؤسٹ کی التجا اور آہ وزاری نے اس ڈرامے کو ایک لافانی انداز بخشا ہے۔ گوئٹے نے فاؤسٹ میں شعری عظمت، تشبیہہ، استعارے اور زبان کے حسن کے علاوہ جس طرح فہم و دانش، اپنے مطالعے اور فکرو فلسفے کو اس ڈرامے میں برتا ہے،یہی گوئٹے کو ایک امتیازی حیثیت دلاتی ہے۔ اس ڈرامے کے دنیا کے مختلف زبانوں میں تراجم ہوئے۔ اردو میں بھی کئی لوگوں نے ترجمہ کیا۔ زیر نظر کتاب گوئٹے کے فاؤسٹ کا پہلا حصہ ہے جس کا اردو ترجمہ منور لکھنوی نے کیا ہے۔ اس ترجمہ کی خوبی یہ ہے کہ اصل کے منظوم حصوں کو اردو ترجمہ میں بھی منظوم باقی رکھا گیا ہے۔ کتاب کے شروع میں مترجم نے ڈرامائی نظم فاوسٹ اور گوئٹے کے سلسلے میں کچھ دل چسپ معلومات بھی شامل کی ہے۔ جو فاوسٹ کی تفہیم میں معاون ہے۔