ناول نگاری ایک بڑا فن ہے اس لئے اس فن کے توسط سے مفروضے گڑھے جاتے ہیں۔ فکری جہتوں کو وسعت ملتی ہے اور اس کے ذریعے ایک نئے جہان کا تصور ممکن ہونے لگتا ہے۔ یہ بات اپنی جگہ درست ہے کہ عالمی سطح پر اردو میں ایسا کوئی ناول موجود نہیں ہے جس سے ناول کے کینوس کی صحیح عکاسی ہوسکے، تاہم آزادی کے پہلے یا بعد کئی اہم بلکہ غیر معمولی ناول لکھے گئے۔ زیر نظر کتاب ’ہند وپاک میں اردو ناول، ایک تقابلی مطالعہ‘ نتں انور پاشا نے جن نکات پر گفتگو کی ہے قابل توجہ ہے۔

پروفیسر انور پاشا جواہرلعل نہرو یونیورسٹی میں اُردو زبان و ادب کے استاد ہیں۔وہ ایک سیاسی مبصر اورشعلہ بیان مقرر و خطیب کے طور پر بھی شہرت رکھتے ہیں۔ ادب اور سماج  کے رشتوں پر ان کی گہری نظر ہے۔ وہ جے این یو کے ہندوستانی زبانوں کے مرکز کے چئیرپرسن بھی رہے ہیں۔ دہلی یونیورسٹی کے مشہور آچاریہ نرندر دیو کالج کے گورننگ باڈی کے چئرمین بھی ہیں۔ تمام سیاسی و سماجی معاملات پر اپنی بے باک رائے کے لئے جانے جاتے ہیں۔ جامعات کے اساتذہ کو متحد کر اُردو کے حقوق کے لئے ہمیشہ کوشاں رہتے ہیں۔