شاعر مشرق علامہ اقبال کے قومی نظریات کو مختلف اندازسے بیان کرتی پیش نظروحید قریشی کی تصنیف"اقبال اور پاکستانی قومیت" ہے ۔جومصنف کے مختلف اوقات میں لکھے گئے،تین مقالوں پر مشتمل ہے۔ پہلے مقالے میں " اقبال کےنظریہ ء وطنیت " سے اوردوسرے مقالے میں" اقبال کے خلافت "سے متعلق نظریات کو پیش کرتے ہوئے ملک کے آئینی مسائل سے بحث کی گئی ہے۔کتاب کا تیسرا مقالہ اپنے موضوع اور پیش کش کے اعتبار سے اہم ہے۔ جس میں شاعر مشرق کے قومی نظریہ کو پیش کیا گیا ہے۔ان مقالات سے پہلے مصنف کا ایک مضمون بعنوان " مسند خلافت یا مجلس قانون ساز ۔فکر اقبال کی روشنی میں "بھی شامل ہے ،جو اپنی معلومات اور نظریات اقبال کے اعتبار سے نہایت ہی وقیع اور جامع ہے۔جس میں مصنف نے مسند خلافت کو اقبال کی فکر و فن کی روشنی میں پیش کیا ہے۔ ان مقالوں کے مطالعے سے قارئین پاکستان میں قومیت کی تشکیل سے متعلق اور دیگر سیاسی امور پر علامہ اقبال کے قومی نظریات سے واقف ہوجاتے ہیں۔

ڈاکٹر وحید قریشی پاکستان کے نامور ادیب، شاعر، نقاد، محقق، معلم اور ماہر لسانیات ڈاکٹر وحید قریشی 14 فروری 1925ء کو میانوالی میں پیدا ہوئے تھے۔ انہوں نے ساہیوال، گوجرانوالہ اور لاہور کے مختلف تعلیمی اداروں میں تعلیم حاصل کی اور فارسی اور تاریخ میں ایم اے کا امتحان پاس کرنے کے بعد یکم اکتوبر 1947ء سے بطور ریسرچ اسکالر اپنی ملازمت کا آغاز کیا بعدازاں انہوں نے فارسی میں پی ایچ ڈی اور اردو میں ڈی لٹ کی اسناد حاصل کیں۔ انہوں نے ایک طویل عرصے تک اسلامیہ کالج لاہور اور اورینٹل کالج پنجاب یونیورسٹی میں تدریس کے فرائض انجام دیئے بعدازاں وہ اقبال اکادمی پاکستان، مقتدرہ قومی زبان پاکستان، بزم اقبال اور مغربی پاکستان اردو اکیڈمی سے وابستہ رہے۔ ستمبر 2003ء سے اپنی وفات تک وہ جی سی یونیورسٹی لاہور میں پروفیسر امریطس کے فرائض انجام دیتے رہے۔ ڈاکٹر وحید قریشی کی تصانیف کی فہرست بھی بہت طویل ہے جس میں شبلی کی حیات معاشقہ، میر حسن اور ان کا زمانہ، مطالعہ حالی، کلاسیکی ادب کا تحقیقی مطالعہ، تنقیدی مطالعے، نذر غالب، اقبال اور پاکستانی قومیت، اساسیات اقبال، قائداعظم اور تحریک پاکستان، مقالات تحقیق، جدیدیت کی تلاش میں،مطالعہ ادبیات فارسی، اردو نثر کے میلانات، پاکستانی قومیت کی تشکیل نو اور دوسرے مضامین، پاکستان کی نظریاتی بنیادیں، اردو ادب کا ارتقا، پاکستان کے تعلیمی مسائل اور شعری مجموعے نقد جاں، الواح اور ڈھلتی عمر کے نوحے شامل ہیں۔ انہوں نے متعدد کتابیں بھی مرتب اور مدون کی تھیں جن میں اردو کا بہترین انشائی ادب، ارمغان ایران، ارمغان لاہور، 1965ء کے بہترین مقالے، توضیحی کتابیات ابلاغیات، ثواقب المناقب، دربار ملی اور علامہ اقبال کی تاریخ ولادت کے نام سرفہرست ہیں۔ حکومت پاکستان نے ڈاکٹر وحید قریشی کی خدمات کے اعتراف کے طور پر 14 اگست 1993ء کو صدارتی تمغہ برائے حسن کارکردگی کا اعزاز عطا کیا تھا۔ ڈاکٹر وحید قریشی 17اکتوبر2009ء کو لاہور میں وفات پاگئے۔ وہ لاہور میں سمن آباد کے قبرستان میں آسودہ خاک ہیں۔