زیر تبصرہ کتاب "اشاریہ اردو" مصباح العثمان کی مرتب کردہ ہے، جس میں انجمن ترقی اردو کے سہ ماہی رسالہ 'اردو' کا مصنف وار اشاریہ ترتیب دیا گیا ہے، کتاب کے شروع میں 'حرفے چند' کے عنوان سے جمیل الدین عالی نے اشاریہ کے حوالے سے مختصر گفتگو کی ہے۔ تعارف کے عنوان سے مرتب نے مختصر لفظوں میں اشاریہ کا تعارف کرایا ہے، اشاریہ چار حصوں پر مشتمل ہے۔ پہلے حصہ میں حروف تہجی کی ترتیب سے مصنفین اور ان کے مضامین کو پیش کیا گیا ہے۔ مضامین کی اشاعت جس شمارہ میں ہوئی، اس کی تاریخ بھی ذکرکی گئی ہے۔ دوسرے حصہ میں اسی ترتیب سے کسی ایک موضوع پر مسلسل شائع ہونے والے مضامین کا اشاریہ پیش کیا گیا ہے۔ تیسرے حصہ میں 'رسالہ اردو' میں شائع ہونے والی قدیم شعراء کی غزلوں کا اشاریہ پیش کیا گیا ہے۔ چوتھا حصہ رسالے میں شائع ہونے والے تبصروں کے اشاریہ پر مشتمل ہے۔ رسالہ میں ادبی تحقیقی و تنقیدی مضامین شائع ہوتے رہے ہیں، اشاریہ کا مطالعہ اس حقیقت کو بخوبی عیاں کرتا ہے، اور رسالہ اردو کے معیار سے واقف کراتا ہے۔