یہ کتاب مولانا اسحاق سندیلوی کی تحریر کردہ نہایت اہم تاریخی دستاویز ہے،جس میں مغربی طرزِ سیاست اورجمہوریت کو دلائل کے ساتھ مسترد کیا گیا ہےاوراسلامی نظامِ حکومت اور شورائیت کا ایک عملی خاکہ اس طرح مرتب کیا گیا ہے کہ وہ عصر جدید کے تقاضوں کو پورا کرسکے۔در اصل 1940 ء میں قراردادِ پاکستان کے اعلان کے بعد اِسی سال ایک اعلیٰ کمیٹی مسلم لیگ نے قائم کی تاکہ مجوزہ پاکستان کے لئے ایک سیاسی نظام مدوّن کیا جاسکے۔ مسلم لیگ کے زیراہتمام تشکیل پانے والی اس کمیٹی میں علامہ سلیمان ندوی، مولانا آزاد سبحانی، مولانا عبدالماجد دریاآبادی اور مولانا ابوالاعلیٰ مودودی رحمہم اللہ جیسے بلند پایہ محققین اور مدبرین شریعت بھی شامل تھے۔ قدیم و جدید علوم کےان ماہرین نے پاکستان کے لئے اسلامی نظام حکومت و سیاست کا تفصیلی مسودہ ۱۹۴۲ء میں مکمل کردیا تھا جسے بعد میں دارالمصنّفین اعظم گڑھ نے"اسلام کا سیاسی نظام"کے عنوان سے کتابی شکل میں شائع کیا۔