بیسویں صدی کے اہم رجحانات میں جدیدیت کو خاص اہمیت حاصل ہے۔جدیدیت کا یہ رجحان کافی متنازعہ بھی رہا ہے۔ترقی پسند تحریک کے زوال کے بعد اردو میں ایک جدیدیت ہمہ گیر تحریک کی صورت ابھری۔یہ ترقی پسند تحریک کی سرمایہ دارانہ جبر و استحصال کے خلاف ایک اجتماعی بغاوت تھی۔جس میں خارجیت سے داخلیت کی طرف رسائی ،شوروغل سے خاموشی ،بھیڑ سے تنہائی کی طرف سفر تھا۔پیش نظر "جدیدت اور اردو افسانہ"ڈاکٹر اسلم جمشید پوری کی تصنیف ہے۔جس میں مصنف نے بیسویں صدی کے اس اہم رجحان جدیدیت کی ابتدا،اس کے تحت تخلیق کردہ افسانوں اور اس رجحان کے بعض منفی رویوں کی نمائندگی کرنے والےمنتخب افسانوں کے تجزیے پیش کیے ہیں۔جدیدیت اور اس عہد میں لکھے گئے افسانوں کو مصنف نے اپنے انداز میں پرکھنے کی سعی کی ہے۔اپنے نقطہ نظر کو واضح کرنے کے لیے مصنف نے دلائل بھی درج کیے ہیں۔کتاب کے آخر میں اردو افسانہ اور جدیدت کے موضوع سے متعلق مباحثہ بھی شامل ہے۔ جو افکا ردہلی میں شائع ہوکر خاصا مقبول ہوچکا تھا۔