زیر نظر "جوہر سخن" اردو شعرا کے کلام کا انتخاب ہے، جس کو مولوی محمد مبین کیفی نے ہندوستانی اکیڈمی کی ایما پر مرتب کیا ہے۔ یہ انتخاب کئی جلدوں پر مشتمل ہے، جن میں نہایت ہی اہتمام کے ساتھ شاعری کے مختلف ادوار کو سامنے رکھ کر انتخاب پیش کیا گیا ہے۔ نیز اس دور کی خصوصیت اور شاعری کے طرز پر بھی روشنی ڈالی گئی ہے۔ پہلی جلد میں دو حصے ہیں، پہلے حصہ میں شعرا ئے دکن اور شعرائے اورنگ آباد کے کلام کو جبکہ دوسرے حصہ میں دور اول کے شعرائے دہلی جس کو ایک طرح سے ایہام گوئی کا دور کہتے ہیں، کے کلام کو پیش کیا گیا ہے۔ دوسری جلد میں اردو شاعری کے زرین دور کے شعرا کا کلام پیش کیا ہے، اس جلد میں یہ دور ۱۷۳۵ سے شروع ہوتا ہے اور تقریبا سو سال تک قائم رہتا ہے، اس درمیان جو صاحب طرز شعرا نمودار ہوتے ہیں، ان کا کلام پیش کیا گیا ہے۔ اس جلد کا آغاز میر تقی میر سے ہوتا ہے۔ تیسری جلد میں بزم عیش و عشرت کے دور کے شعرا کا کلام پیش کیا گیا ہے، یہ بزم عیش و عشرت وہی دور ہے جب اودھ میں چاروں طرف انبساط و کامرانی اور جوش نشاط ہے۔ قصائد میں نشاط کی روح اور غزلوں پر بزم نوازی کا تموج، بات بات میں لطیفہ سنجی اور لفظ لفظ میں تصنع اور ظاہری شان و شکوہ اس دور کا شعار نظر آتا ہے۔ چوتھی جلد میں اسی سلسلے کو مزید کرتے ہوئے باقاعدہ شعرائے لکھنو خاص کر مرثیہ اور مرثیہ گویوں پر زیادہ توجہ ہے۔ اسی کا دوسرا حصہ پانچویں جلد ہے جس میں شعرائے دہلی کا کلام ہے۔ تمام جلدوں بلکہ ادوار میں صاحب طرز شعرا کی ایک بڑی تعداد شامل ہے، ساتھ مختصر تعارف بھی۔