زیر تبصرہ کتاب "کتھا چار جنموں کی" ڈاکٹر ستیہ پال آنند کی خودنوشت سوانح ہے، جس کو چار حصوں میں تقسیم کیا گیا ہے، کتھا پہلے جنم کی بچپن کے احوال پر مشتمل ہے ، پانچ سال کی عمر سے یادداشتوں کو درج کیا گیا ہے، گھریلو احوال پر روشنی ڈالی گئی ہے، جس میں ہندو مسلم اتحاد و اتفاق کی صورت حال بھی بیان کی گئی ہے، اسی حصہ میں تلوک چند محروم سے اپنے نیاز مندانہ تعلقات کا اظہار کیا گیا ہے۔ کتھا دوسرے جنم کی دوسرا حصہ ہے، اس میں والد کے انتقال کا تذکرہ کیا گیا ہے، جو پاکستان سے ہجرت کرتے ہوئے انتقال کرگئے تھے، ستیہ پال آنند نے ہجرت کی تکالیف جھیلیں تھیں، اس حصے میں زندگی کے تیرہ برسوں کی روداد رقم کی گئی ہیں، جس کی روشنی میں ان کی ادبی خدمات بھی آشکار ہوتی ہے، اور مختلف ادباء کا تذکرہ ملتا ہے، شوکت صدیقی، راجندرسنگھ بیدی، کرشن چندر،سریندر پرکاش، دیوندر ستھیارتھی، وغیرہ۔ کتھا تیسرے جنم کی اس حصے میں درس و تدریس اور ادبی محفلوں میں شرکت کے حالات پیش کئے ہیں، جن ادباء سے اس دوران ملاقاتیں ہوئیں، ان کا تذکرہ کیا گیا ہے۔ کتھا چوتھے جنم کی مصنف کے امریکا قیام کی صورت حال کو پیش کرتی ہے، اور وہاں رہنے والے ان کے احباب سے واقف کراتی ہے، ن م راشد کا اس میں تفصیلی تذکرہ ہے، کتاب اپنی معلومات اور اسلوب کے اعتبار سے اہمیت کی حامل ہے۔