کلیم ضیا نثرنگار بھی ہیں اور شاعر بھی۔ ان کے افسانوں کا پہلا مجموعہ ’’ناسور‘‘ 1997ء میں شائع ہوا۔ انہوں نے بچوں کے لئے بھی کہانیاں لکھی ہیں۔ ’’لالچی بیرا‘‘ اور ’’کھچڑی‘‘ بچوں کی کہانیوں پر مشتمل دو مجموعے بالترتیب 2002 ء اور 2010ء میں شائع ہو چکے ہیں۔ اسی طرح موصوف تخلیق عمل کے ساتھ تحقیق و تنقید سے بھی دلچسپی رکھتے ہیں۔ ان کا پی۔ایچ۔ڈی کا مقالہ ’’حضرت شاہ غلام حسین چشتی ایلچپوری، حیات و خدمات‘‘ 2001ء میں منظر عام پر آیا۔ ان کے تنقیدی و تحقیقی مضامین کا مجموعہ ’’نقطۂ نظر‘‘ بھی شائع ہوچکا ہے۔ کلیم ضیا کی پیدائش گوکہ ودربھ کے شہر ملکاپور میں ہوئی مگر ان کی زندگی کا بیشتر حصہ ممبئی میں گذرا۔ وہ ہنوز ممبئی میں ہی مقیم ہیں۔ ممبئی کے ماحول میں ان کے ادبی و شعری ذوق کو جلا ملی۔ یہی وجہ ہے کہ وہ ادب کے مختلف اصناف پر خوب لکھتے ہیں۔ ان کا ایک شعری مجموعہ ’’پس آئینہ‘‘ کے نام سے 2003ء میں اشاعت پذیر ہوا۔

کلیم ضیا کو مکمل جدید لہجے کا شاعر نہیں کہا جاسکتا وہ روایتی انداز میں شعر کہتے ہیں چونکہ دورجدید کے پروردہ ہیں اس لئے غیر شعوری طور پر ان کی فکر اور سوچ پر جدید لہجہ چھا جاتا ہے۔

کلیم ضیا کا ذریعۂ معاش(ملازمت) ایسوسی ایٹ پروفیسر اردو، گورنمنٹ آف مہاراشٹر اسماعیل یوسف کالج آف آرٹس، سائنس اینڈ کامرس ممبئی۔