قاضی اطہر مبارکپوری کی متعدد تاریخی کتابیں مشہور ہیں جن میں " عرب و ہند عہد رسالت میں اور ہندوستان میں عربوں کی حکومتیں " شامل ہیں۔ زیر نظر کتاب ضخیم ہے ، اس کے باوجود قاری مشمولات کی معنویت کے سبب قرائت میں بیزاری محسوس نہیں کریں گے، اس میں سنہ ۴۰ ہجری سے لے کر ۱۳۲ ہجری تک یعنی ۹۲ سال کے حالات و واقعات نہایت شرح و بسط کے ساتھ بیان کیے گئے ہیں۔ ان بیانات اور مباحث کی ترتیب میں اموی دور حکومت اور ہندوستان کے تعلقات کے مختلف گوشوں کو جس دیدہ وری سے ایک لڑی میں پرونے کی سعی ہوئی ہے، اس کا اندازہ کتاب پڑھنے کے بعد بخوبی لگایا جاسکتا ہے۔ اس ۹۰ سالہ دور کی اسلامی غزوات و فتوحات، ولایات و امارات، ملکی و شہری انتظامات اور مسلمانوں کے تمدنی ، ثقافتی، علمی ، معاشرتی حالات اور اہل ہند اور مسلمانوں کے درمیان گوناگوں تعلقات پر مفصل بحث کی گئی ہے۔ کتاب کی ایک خصوصیت یہ بھی ہے کہ اموی دور کے رجال کے اسماء ، احوال و تراجم میں جو تحریف تھی ، مصنف نے بڑی عرق ریزی کرکے ان کی تصحیح کی اور اگر ان اسماء کے حالا ت نہ مل سکے تو اس کی تصریح کردی ہے۔ یہ کتاب سند کے طور پر پیش کئے جانے کے قابل ہے۔