بشریٰ رحمٰن کا ناول تو "خوبصورت" ہے لیکن اس کا موضوع "بدصورتی" ہے۔ مصنفہ نے حسن پرست دنیا میں موجود بدصورت لوگوں کی تکلیف دہ زندگی کی عکاسی کی ہے۔انسان فطرتا حسن پرست، خوبصورتی کا دلدادہ ہوتا ہے،بعض انسان تو صرف حسن پرست ہی نہیں خود پسند بھی ہوتے ہیں۔ایسے لوگ دیگر بد صورت لوگوں کی زندگی کو بری طرح متاثر کرتے ہیں۔جس سے ان کے رویوں اور معمولات زندگی میں ہمیشہ منفی اثرات دکھائی دیتے ہیں۔ پیش نظر ناول "خوبصورت "کا مرکزی کردار معاذ بدصورت اور اس کی بیوی رملی بے حد حسین ہے۔معاذ بظاہر تو بدصورت ہے لیکن اس کےباطن میں چھپی خوبصورتی اسےمعاشرے میں اہم مقام عطا کرتی ہے۔ یہ کردار حساس بھی ہے،جو اپنی بیوی اور دوست احباب کے منفی رویوں کا سامنا خوبصورت دل کے ساتھ مثبت انداز میں کرتا ہے۔یہ ناول ظاہری خوبصورتی کو معیار نہ بناکر باطنی خوبصورتی کو اہمیت دینے کےاصلاحی پیغام کے ساتھ اہم ہے۔بشریٰ رحمٰن نے اس ناول میں کمپیر اور کنٹراسٹ تکنیک کا استعمال کیا ہے۔