تحریک خلافت کی ابتدا مرد مجاہد مولانا محمد علی سے ہوئی تھی،تحریک خلافت کے لیے انھوں نے یورپ کا سفر کیا،گاندھی جی نے تحریک خلافت کی حمایت کی ۔علی گڑھ یونیورسٹی کے ارباب کو اس بات پر مجبور کیا گیا کہ وہ حکومت سے اپنا تعلق ختم کرلیں ،تاہم علی گڑھ کے ارباب نے اس کو ماننے سے انکار کر دیا ،اس موقع پر مولانا محمد علی کی خطابت اور زور بیان نے نوجوانوں کے دلوں کو مسخر کیا اور طلباء کی ایک بڑی تعداد کالج چھوڑ کر جامعہ ملی کے ساتھ جڑنے لگے ،تحریک خلافت کے دوران ہندوستانی مسلمانوں پر مذہبی جذباتیت پوری طرح طاری تھی۔اس تحریک کے مقصد ، اور اغراض و مقاصد کو مولانا محمد علی جو ہر نے الگ الگ مقامات اور جلسوں میں انھوں نے بڑی پر جوش تقریریں کیں، زیر نظر کتاب میں مولانا محمد علی جوہر کی وہ تمام تقریریں شامل ہیں جو انھوں نے اس ہنگامہ خیز دور میں کی تھیں۔ان تمام تقریروں کو رئیس احمد جعفری نے یکجا کرکے ، کتابی شکل دی اور اس کا نام خطبات محمد علی رکھا ۔کتاب کے انتساب میں نہایت ہی اہم جملہ لکھا ہوا ہے"آزاد ہندوستان کے نام! جس کی تعمیر میں محمد علی کا اتنا ہی حصہ ،جتنا گاندھی جی کا۔"

محمد علی نام، جوہر تخلص۔ لقب ’’رئیس الاحرار‘‘۔۱۸۷۸ء میں رام پور میں پیدا ہوئے۔ علی گڑھ اور لنکن کالج، آکسفورڈ میں تعلیم حاصل کی۔ ریاست ہائے بڑودہ اور رام پور میں ملازم رہے۔ ترک ملازمت کے بعد کلکتہ سے ہفتہ وار’’کامریڈ‘‘ اخبار جاری کیا۔دہلی میں ’’ہمدرد‘‘ کے نام سے اردو میں بھی اخبار کا اجرا کیا۔ ۱۹۱۴ء میں برطانوی پالیسی کے خلاف لکھنے پر آپ کو نظر بند کیا گیا۔۱۹۱۹ء میں رہائی کے بعد تحریک خلافت میں حصہ لیا۔ گاندھی کی معیت میں ملک کی آزادی وتحریک خلافت کی تنظیم وتبلیغ کی غرض سے تحریک موالات میں حصہ لیا جس کی وجہ سے دوبار جیل جانا پڑا۔ ۱۹۴۳ء میں رہا ہوئے اور اسی سال کانگریس کے صدر بنائے گئے۔ بعض ہندوؤں کی ذہنیت کی وجہ سے مولانا کانگریس سے الگ ہوگئے۔مولانا گول میز کانفرس میں شرکت کے لیے لندن گئے اور وہیں ۴؍جنوری ۱۹۳۱ء کو انتقال کرگئے۔ بیت المقدس میں دفن ہوئے۔ شاعری میں داغ کے شاگرد تھے۔ دیوان ’’جوہر‘‘ شائع ہوگیا ہے۔ محمد علی جوہرؔ انگریزی زبان کے صاحب طرز انشا پرداز تھے۔ ہندوستان کی آزادی کے بہت بڑے علم بردار اور مسلمانوں کے محبوب لیڈر تھے۔