سید مصطفیٰ زیدی جدید شعرا ئےاردو میں ایک اہم نام ہے ۔وہ بنیادی طور پر نظم کے شاعر ہیں۔جن کی نظمیں داخل اور خارج کا حسین امتزاج ہیں۔مگر ان کی غزل بھی نظر انداز کی جانے والی نہیں ہے۔ غزل میں بھی وہ ایک صاحب طرز شاعر ہیں۔ان کی غزل کی لذت اور انفرادیت انھیں زندہ رکھنے کے لیے کافی ہے۔"کوہ ندا" ان کی نظموں اور غزلوں کاآخری مجموعہ ہے۔ان کی زندگی مختلف نشیب و فراز سے گذری اور ان ہی نشیب و فراز کا عکس ان کے کلام میں نظر آتا ہے۔انھیں جس درد وکرب سے گذرنا پڑا اس کی باز گشت ان کی نظموں اور غزلوں میں صاف سنائی دیتی ہے۔ان کی شاعری کے کئی رنگ ہیں۔انھوں نے اپنی خوبصورت اور موثر شاعری سے لاکھوں لوگوں کو متاثر کیا۔ان کی شاعری میں لطافت ،سلاست اور ندرت ہے۔جہاں ان کا کلام ایک طرف رومانیت کا ترجمان ہے تو دوسری طرف اداسی اور مایوسی بھی چھائی ہوئی ہے۔پیش نظر مجموعہ میں "ماہ و سال،آخری بار ملو، حرف سادہ ،نذر غالب، نذر داغ ،چارہ گر وغیرہ نظمیں اور غزلیں شامل ہیں۔

نام سید مصطفی حسین زیدی اور تخلص زیدی تھا۔ شروع میں تیغ الہ آبادی تخلص کرتے تھے۔۱۰؍اکتوبر۱۹۲۹ء کو الہ آباد میں پیدا ہوئے۔اوائل طالب علمی ہی سے شاعری کا شوق پید ا ہوگیا تھا۔انٹرمیڈیٹ اور بی اے کے امتحانات امتیاز کے ساتھ پاس کیے۔ ایم اے (انگریزی) کا امتحان ۱۹۵۲ء میں گورنمنٹ کالج، لاہور سے پاس کیا۔ دوران تعلیم ان کی غیر معمولی قابلیت کے اعتراف میں انھیں کئی گولڈ میڈل اور تمغے ملے۔۱۹۵۴ء میں سول سروس کے امتحان میں کامیاب ہوئے۔مختلف شہروں میں ڈپٹی کمشنر رہے۔ حکومت پاکستان نے اعلی کارکردگی کے صلے میں انھیں’’تمغاے قائد اعظم ‘‘ عطا کیا۔۱۲؍اکتوبر۱۹۷۰ء کو کراچی میں مصطفی زیدی کی اچانک موت کا سانحہ رونما ہوا۔ ان کا پہلا مجموعہ شاعری’’روشنی‘‘ کے نام سے قیام پاکستان سے قبل شائع ہوا ۔ان کے دیگرشعری مجموعوں کے نام یہ ہیں: ’زنجیریں‘، ’شہرآذر‘، ’موج مری صدف صدف‘، ’گریباں‘، ’قباے ساز‘، ’کوہ ندا‘۔ بحوالۂ:پیمانۂ غزل(جلد دوم)،محمد شمس الحق،صفحہ:240